Беларускіх вайскоўцаў адправяць у Сірыю?

Паводле інфармацыі ініцыятывы BYPOL, у Заходняе і Паўночна-Заходняе аператыўнае камандаванне Узброеных Сіл Беларусі прыйшла разнарадка па выдзяленні вайскоўцаў для арганізацыі патрулявання тэрыторый у Сірыі. Як мяркуецца, першая адпраўка байцоў у колькасці 300 чалавек з кожнага камандавання, адбудзецца ў верасні 2021 года.



Вядома, што афіцэры, якія дапушчаныя да гэтай інфармацыі, у спешным парадку спрабуюць звольніцца або перавесціся ў іншыя падраздзяленні, пішуць аўтары з BYPOL. Маёр Ігар Гіль, які павінен быў стаць камандзірам міратворчай роты, спрабуе перавесціся ў штаб, але на дадзены момант беспаспяхова.

Што тычыцца матэрыяльнага складніка, то кантрактнікам абяцаюць каля $ 2000 даляраў у месяц. Для параўнання ў Расіі і французскім Замежным Легіёне за камандзіроўкі ў зону баявых дзеянняў, часцяком нашмат менш інтэнсіўных, чым у Сірыі, плацяць у разы больш.

Камандаванне Сіл спецыяльных аперацый праз сваіх ідэолагаў ужо пачало актыўную прапагандысцкую кампанію па вярбоўцы ў міратворцы салдат тэрміновай службы. Паколькі ўся ідэалогія ў ССО пабудавана на прыкладах гераічных баёў ПДВ і іншых элітных падраздзяленняў СССР і Расіі, то частка салдат з ССО паддаюцца вярбоўцы.