Брытанскія СМІ палічылі, колькі людзей загінула з-за выбуху Чарнобыльскай АЭС

Брытанскі тэлеканал BBC падрыхтаваў матэрыял, у якім паспрабаваў падлічыць колькасць ахвяраў Чарнобыльскай АЭС. У ім з першых жа слоў нагадалі, што аварыю старанна хаваў Савецкі Саюз, але сапраўдная колькасць смерцяў раскрываецца толькі цяпер. Kyky.org прыводзіць галоўныя тэзісы.

Катастрафічны выбух адбыўся 26 красавіка 1986 года на рэактары №4. У пяцідзесяці мілях адсюль знаходзіўся ваўняны камбінат у Чарнігаве. У ім захварэлі работніцы, якія працавалі па 12 гадзін у суткі. Улады пачалі расследаванне і высветлілі, што ўзровень радыяцыі на фабрыцы дасягнуў 180 мЗв / г. Любы, хто трапіў пад уздзеянне такога ўзроўню, перавысіў бы агульную гадавую бяспечную дозу менш, чым за хвіліну. Выпадак з чарнігаўскімі работніцамі раскрыла гісторык з Масачусецкага тэхналагічнага інстытута Кейт Браўн. Яна ездзіла па Украіне, Беларусі і Расіі, гутарыла з выжылымі, шукала справаздачы бальніц. Па словах Кейт, 288 жанчын альбо памерлі, альбо атрымалі пенсіі па здароўі.
Па афіцыйных звестках, статус ліквідатара атрымалі 600 тысяч чалавек — пажарныя, інжынеры, вайскоўцы, міліцыянты і гэтак далей. Іх адправілі змагацца з радыеактыўнымі элементамі. Хоць Расійская Акадэмія Навук сцвярджае, што ў іх камандах магло быць да 830 тысяч чалавек, але гэтыя ацэнкі прызналі ненавуковымі.
Ва Украіне вялі рэестр сваіх грамадзян, якія пацярпелі з-за чарнобыльскай аварыі. У 2015 годзе ў базу дадзеных унеслі 318 988 чалавек, хоць, па дадзеных новай справаздачы Нацыянальнага даследчага цэнтра радыяцыйнай медыцыны ва Украіне, паміж 2003 і 2007 гадамі абследавалі значна больш работнікаў-ліквідатараў — 651 453 чалавекі. У Беларусі зарэгістравана 99 693 ліквідатара, а ў іншы рэестр увайшлі 157 086 расійскіх ліквідатараў.
Узровень смяротнасці сярод гэтых украінцаў вырас з 3,5 да 17,5 смерцяў на 1000 чалавек у перыяд з 1988 па 2012 гады. Сярод ліквідатараў павысілася інваліднасць. У 1988 годзе 68% з іх прызналі здаровымі, а праз 26 гадоў толькі 5,5% засталіся такімі. У Беларусі да 2008 года налічвалася 40 049 ліквідатараў з ракам, яшчэ 2833 — у Расіі. Праўда, некаторыя эксперты не лічаць, што радыяцыйнае ўздзеянне паўплывала на развіццё анкалогіі.
Трагедыя закранула жыхароў Прыпяці — 49 614 чалавек. Іх і яшчэ 41 986 чалавек з 80 населеных пунктаў эвакуіравалі, а перасялілі 200 тысяч чалавек. Усіх выратаваных вывучалі лекары: іх смяротнасць пастаянна расла і дасягнула піку ў 2008-2012 гадах: 18 смерцяў на 1000 чалавек. Акрамя таго, Кейт Браўн выявіла схаваныя бальнічныя запісы. Там пазначана, што па ўсім рэгіёне і аж да Масквы 40 тысяч чалавек шпіталізавалі летам пасля аварыі, у тым ліку жанчын і дзяцей.
Намеснік гендырэктара кіеўскага Нацыянальнага даследчага цэнтра радыяцыйнай медыцыны Віктар Сушко запэўнівае, што колькасць ахвяр Чарнобыля ва Украіне ўпала на 657 988 з 2007 года, гэта значыць на 26%. Хутчэй за ўсё, гэта звязана з міграцыяй.
Паказчыкі смяротнасці ў раёнах, забруджаных радыяцыяй, паступова павялічваюцца ў параўнанні з астатняй часткай Украіны. Яны дасягнулі піку ў 2007 годзе, калі больш за 26 чалавек з 1000 памерлі, хоць сярэдні паказчык па краіне — 16 чалавек на 1000 чалавек. Агульнай колькасцю каля 150 000 «квадратаў» Беларусі, Расіі і Украіны лічацца забруджанымі, а зона адчужэння плошчай 4 000 квадратных метраў, памеры якой у два разы перавышае памеры Лондана, застаецца практычна неабжытай.