Цяпер кастрычнік. ICAO перанесла разгляд справаздачы аб прымусовай пасадцы Ryanair у Мінску

Папярэднія вынікі расследавання Міжнароднай арганізацыі цывільнай авіяцыі (ICAO) павінны былі з'явіцца 13 верасня, але іх так і не апублікавалі.

Міжнародная арганізацыя цывільнай авіяцыі перанесла на кастрычнік разгляд папярэдняй справаздачы па інцыдэнце з рэйсам Ryanair. Пра гэта паведаміла агенцтва РИА «Новости» са спасылкай на Дэпартамент па авіяцыі Беларусі, якому прыйшло такое паведамленне з ICAO. На сайце самой міжнароднай арганізацыі такой навіны няма.

Папярэднія вынікі расследавання ICAO павінны былі з'явіцца 13 верасня, але ў той дзень іх не апублікавалі. Раней расійскі прадстаўнік у ICAO Сяргей Гудкоў заявіў, што арганізацыя не змагла абмеркаваць папярэднюю справаздачу па сітуацыі з Ryanair у ходзе пасяджэння 13 верасня. Новая дата абмеркавання тады не была прызначаная.

«Міжнародная арганізацыя грамадзянскай авіяцыі апавясціла беларускі бок аб пераносе на кастрычнік разгляду папярэдняй справаздачы па інцыдэнце з самалётам кампаніі Ryanair», — распавялі ў дэпартаменце па авіяцыі Беларусі.

Міжнародная арганізацыя цывільнай авіяцыі (ICAO) рыхтуе даклад з папярэднімі высновамі пра інцыдэнт з самалётам авіякампаніі Ryanair, які на шляху з Афін да Вільні прымусова пасадзілі ў Мінску 23 мая. На борце знаходзіўся апазіцыйны журналіст і блогер Раман Пратасевіч, яго затрымалі.

Дэлегацыя ICAO наведвала Беларусь у канцы жніўня.

Чакаецца, што канчатковыя высновы агучаць у лістападзе на сесіі Рады ICAO. Што тычыцца прамежкавага дакладу для Рады ICAO, дык яго дэталі могуць агучыць толькі са згоды дзяржаваў, якія ўваходзяць у арганізацыю. Калі такая дамова паміж дзяржавамі будзе, ІСАО мае апублікаваць прэс-рэліз неўзабавае пасля дакладу, паведамілі раней «Свабодзе» прадстаўнікі арганізацыі.