«Цырк зладзілі». Як у Слуцкім раёне рыхтуюцца да візіту Лукашэнкі
Працы па добраўпарадкаванні вёсак Рачкавічы і Лядна вядуцца тыдзень. Работнікі кажуць, што працы планавыя, а жыхары вёскі — што да іх у пятніцу прыедзе Аляксандр Лукашэнка.
У рэдакцыю газеты kurjer.info патэлефанавала жыхарка Лядна і паведаміла, што ў іх на ўсю моц ідзе падрыхтоўка да прыезду прэзідэнта:
— З суседзямі смяёмся, што цырк зладзілі. Да гэтага нічога не рабілася, а цяпер прыгналі тэхніку з горада і суседніх вёсак і працуюць да ночы.
Па інфармацыі выдання, у вёсках усталёўваюць новыя платы, мяняюць апоры ліній электраперадачы, кладуць асфальт, чысцяць сажалкі.
Пажылы жыхар Рачкавічаў, адказваючы на пытанне журналістаў, ці едзе прэзідэнт, сказаў:
— Можа, прэзідэнт, а можа, прэзідэнтша. А наогул паказуху зладзілі. Штаны нацягваюць, а яны парваліся.
З аднаго боку жыхары вёскі абураныя гэтай карцінай. Яны лічаць, што гэта ўсё «паказуха для кіраўніка дзяржавы». З іншага — рады.
— Ужо ўсё роўна, прыедзе Лукашэнка ці не, галоўнае, што тут навялі парадак. За пару дзён зрабілі тое, чаго не маглі зрабіць дзесяцігоддзямі, — дзеліцца жыхар Рачкавічаў.
Вясковыя бабулі мараць убачыцца з прэзідэнтам. Хочуць паціснуць яму руку і пажадаць здароўя.
— Можам нават бохан хлеба з шампанскім вынесці. Мы ж яго толькі па тэлевізары бачым. А чаго нам скардзіцца? Пенсію атрымліваем, ніхто нас не крыўдзіць, — кажа Галіна. — Праўда, за ўсё жыццё ўпершыню бачым такое (добраўпарадкаванне вёскі - kurjer.info).
Вось толькі марам бабуль спраўдзіцца не наканавана: у бліжэйшую пятніцу ў Лукашэнкі нараду, таму на Случчыне ён не прыедзе. Пра гэта паведамілі выданню ў Мінаблвыканкаме.
Паводле gazetaby.com