Чаму падчас дзіцячага спектакля прыйшоў АМАП? Тлумачыць дырэктар тэатра

У Музычным тэатры падчас антракту дзіцячага спектакля з'явіліся амапаўцы. Дырэктар тэатра патлумачыў, што яны там рабілі, піша TUT.BY.



27 верасня ў Музычным тэатры адбыўся паказ ранішняга спектакля «Мэры Попінс». У антракце гледачы нечакана ўбачылі ў фае людзей у чорным. Іх фатаграфію апублікавала на сваёй старонцы ў Фэйсбуку блогер, эксперт культуры і этыкету Аксана Зарэцкая.

На наступны дзень, 28 верасня, адзін з гледачоў пакінуў электронны зварот на сайце тэатра. 1 кастрычніка яму адказаў дырэктар тэатра Сяргей Пукіта (адказ ёсць у размяшчэнні TUT.BY).

Як патлумачыў Пукіта, «людзі, апранутыя ў форму з апазнавальнымі знакамі, зайшлі ў памяшканне тэатра з мэтай скарыстацца грамадскай прыбіральняй».

Як удакладніў дырэктар калектыву, з боку людзей, якія ўвайшлі ў тэатр, «не здзяйснялася дзеянняў, якія маглі нанесці шкоду жыццю і здароўю гледачоў».

Паводле tut.by