Эканаміста Чалага таксама асудзілі за «Чарнобыльскі шлях»

У судзе Савецкага раёна Мінска 17 траўня прайшоў разгляд адміністрацыйнай справы ў дачыненні да эканаміста-аналітыка Сяргея Чалага. Яго абвінавачвалі ва ўдзеле ў несанкцыянаваным масавым мерапрыемстве — «Чарнобыльскім Шляху», які прайшоў у Мінску ў пятніцу 26 красавіка.

Пратакол адміністрацыйнага правапарушэння складзены на падставе ч.1 арт. 23.34 (удзел у несанкцыянаваным масавым мерапрыемстве).

Позву ў суд Сяргей Чалы змясціў на сваёй старонцы ў фэйсбуку. 

Суддзя Сяргей Шаціла вынес пастанову аб прыцягненні Сяргея Чалага да адміністрацыйнай адказнасці ў выглядзе штрафу ў памеры 10 базавых велічынь.

“Чарнобыльскі шлях – 2019” — самы нешматлюдны за ўсю гісторыю іх правядзення: удзел бралі, апрача журналістаў і супрацоўнікаў міліцыі ў цывільным, прыкладна каля сарака грамадзян. Аднак па ўзроўню адміністрацыйнага пераследу ягоных удзельнікаў імкнецца да сумнага лідарства.

Праваабаронцам вядома, што шасцёра ягоных удзельнікаў пакараны адміністрацыйнымі штрафамі і папярэджаннямі, а ў дачыненні яшчэ да некалькіх удзельнікаў маршу складзеныя пратаколы, якія чакаюць свайго разгляду ў судах.