ЕС абвясціў конкурс стыпендый для пацярпелых ад рэпрэсій навучэнцаў

Еўрапейскі Саюз у рамках праграмы «EU4Belarus: салідарнасць з народам Беларусі» аб’яўляе конкурс заявак на атрыманне стыпендый «EU4Belarus — SALT (Support for Advanced learning and training)» для беларускіх студэнтаў і студэнтак, якія ўжо навучаюцца ва ўніверсітэтах Літвы, Латвіі, Чэхіі і Польшчы, а таксама для тых, хто паступіць у ВНУ гэтых краін у 2021/22 і ў 2022/23 навучальных гадах.

Стыпендыя даецца на ўвесь перыяд навучання па праграме бакалаўрыята або магістратуры і складае 450 еўра ў месяц, з верасня па чэрвень. Дадаткова прадугледжана аднаразовая кампенсацыя дарожных выдаткаў, паведамляе Офіс Святланы Ціханоўскай.

На стыпендыю могуць прэтэндаваць дзейныя студэнты і студэнткі ўніверсітэтаў Літвы, Латвіі, Чэхіі і Польшчы і тыя, хто ўжо падалі дакументы на залічэнне на 2021/22 навучальны год, якія адпавядаюць аднаму з пералічаных ніжэй крытэрыяў:

— пацярпелі ад рэпрэсій падчас выбараў і пратэстаў і былі вымушаныя з'ехаць з Беларусі;

— церпяць матэрыяльныя цяжкасці або не маюць дастаткова сродкаў для пражывання ў адной з чатырох названых краін;

— маюць інваліднасць.

Заяўкі прымаюцца да 6 верасня 2021 года. Больш інфармацыі і спіс неабходных дакументаў можна знайсці на сайце: http://eu4belarus.info.

«EU4Belarus: салідарнасць з народам Беларусі» — гэта пакет спецыяльных мер, прыняты Еўрапейскім Саюзам у адказ на палітычны крызіс, які разгарнуўся пасля прэзідэнцкіх выбараў у Беларусі. Глабальная мэта гэтых мер — садзейнічаць ўмацаванню ўстойлівасці дзеля пашырэння грамадзянскіх правоў і магчымасцей і ўстойлівага эканамічнага росту ў Беларусі. Праграма «EU4Belarus — SALT» адмініструецца «Central Project Management Agency» і рэалізуецца ў супрацоўніцтве з Офісам па адукацыі кабінета Святланы Ціханоўскай.