Фотафакт: у Марачоўшчыне адкрылі помнік Касцюшку

Урачыстая цырымонія пачалася сёння а 12 гадзіне, паведамляе «Радыё Свабода».

12 траўня а 12-ай гадзіне на тэрыторыі мемарыяльнага музэя-сядзібы Касьцюшкі каля Косава на Берасцейшчыне адбылося ўрачыстае адкрыццё помніка Тадэвушу Касцюшку.
​Збор сродкаў на ўсталяванне помніка Касцюшку быў ініцыяваны журналістам Глебам Лабадзенкам. Праект падтрымалі 690 чалавек, якія сабралі больш за 22 тысячы беларускіх рублёў. Імёны ўсіх ахвярадаўцаў будуць захоўвацца ў музеі.

Помнік быў адліты ва Украіне паводле праекту беларускага скульптара Геніка Лойкі.
Тадэвуш Касцюшка — нацыянальны герой Беларусі, Польшчы, ЗША, ганаровы грамадзянін Францыі, кіраўнік вызвольнага паўстання 1794 году. Нарадзіўся 4 лютага 1746 году, памёр 15 кастрычніка 1817 году. Лічыцца адным з самых вядомых у свеце беларусаў.

Помнікі яму стаяць у Варшаве, Кракаве, Лодзі, Бостане, Вашынгтоне, Дэтройце. Усяго па ўсім сьвеце — болей за 200 вялікіх і малых формаў. У ягоны гонар названыя самая высокая гара ў Аўстраліі, востраў на Алясцы, акруга ў штаце Індыяна, політэхнічны ўнівэрсытэт у Кракаве, а таксама шматлікія плошчы, вуліцы, паркі розных краінаў свету.
У Беларусі дагэтуль не было ніводнага помніка Касцюшку, калі не лічыць бюсты на тэрыторыі амерыканскай амбасады ў Мінску і ў вёсцы Малыя Сяхновічы, дзе была радавая сядзіба.