Фотафакт: У Полацку аднаўляюць помнік літары «Ў»

1 верасня жыхары і госці Полацка павінны ўбачыць новы помнік літары «Ў», пра гэта паведаміў мясцовы краязнаўца Андрэй Бухавецкі.

Мяркуючы па прадстаўленым здымкам, помнік, а ў прыватнасці — стэла, будзе значна адрознівацца ад першапачатковага. Так, цяпер цытата Рыгора Барадуліна «Ад Еўфрасінні, ад Скарыны, ад Полацка пачаўся свет» перанесеная з круглай пліты пастамента на адну з граней прызмы стэлы. Вельмі цікавым рашэннем выглядае тое, што ў літару «С» у слове «свет» ўпісаны сігнет Францыска Скарыны — антрапаморфныя сонца і месяц, якія перакрываюць адзін аднаго. Таксама цяпер на помніку з’явілася пазначэнне аўтара цытуемых радкоў.

На другой грані прызмы, якую раней поўнасцю займала стылізаваная літара «Ў», зараз змешчаная паменшаная выява гэтай літары курсівам, а таксама шэраг слоў, якія яе ўтрымліваюць, напрыклад: Браслаў, кіроўца, настаўнік, дзеяслоў і г. д. Усе гэтыя словы выкананыя рознымі шрыфтамі. Алфавіт, як і на першапачатковым помніку, застаўся, але цяпер ён затушаваны і адыходзіць на другі план.

Аўтарам праекта рэканструкцыя помніка літары «Ў», згодна пашпарта аб’екта, з’яўляецца Ігар Куржалаў. Падраднай арганізацыяй выступае ЖКГ Полацка.

Нагадаем, што помнік літары «Ў» у Полацку быў адкрыты ў 2003 годзе пад час свята беларускага пісьменства. Першапачатковая ідэя помніка належыць беларускаму каліграфу прафесару Паўлу Семчанка, а яго аўтар — беларускі скульптар Аляксандр Фінскі. У 2014 годзе помнік быў пашкоджаны, пры гэтым камісія Полацкага райвыканкама прыйшла да высновы, што гэта адбылося натуральным чынам.
Паводле news.vitebsk.cc