Галоўная праблема ўязнога турызму ў Беларусі — візавы рэжым, лічаць эксперты

Галоўная праблема ў прыцягненні ў Беларусь замежных турыстаў — візавы рэжым.



 Такое меркаванне выказаў старшыня Грамадскага савета па развіцці сельскага турызму Валожынскага раёна, уладальнік аграсядзібы "Ганка" Анатоль Ганец 5 чэрвеня на круглым стале "Уязны і ўнутраны турызм: праблемы, тэндэнцыі, перспектывы", які быў арганізаваны ў межах Чацвёртага міжнароднага фестывалю тэрытарыяльнага маркетынгу і брэндынгу OPEN. 

"Ніводзін замежны грамадзянін не жадае чакаць месяц-паўтара, пакуль яму адкрыюць візу. Ён плануе свой адпачынак, аддае пашпарт на візу і атрымлівае яго праз паўтара месяца, а ён хоча прыехаць праз тыдзень", — растлумачыў ён. 

Паводле слоў Ганца, за мінулы год яго сядзібу наведалі 1,5 тыс. замежных турыстаў. "Людзі едуць на сядзібу з задавальненнем, таму што ў нас ёсць праграма, і яны прыязджаюць не проста паесці. А едуць чаму? Таму што ў нас зялёная краіна, дабрадушныя людзі, выдатная кухня, цікавыя ідэі і фестывалі, якіх няма ў іх", — сказаў ён. 

Як адзначыў старшыня Рэспубліканскага саюза турыстычных арганізацый Валянцінаў Цахмейстар, вопыт чэмпіянату свету па хакеі 2014 года паказаў, што турыстаў адпужвае не столькі кошт візы, колькі працэдура атрымання. "Многія скарысталіся чэмпіянатам і бясплатным уездам, каб проста паглядзець краіну, пагуляць, наведаць сядзібы", — сказаў ён. 

Паводле слоў Цахмейстара, прадстаўнікі турбізнесу прапанавалі ўраду забяспечыць бясплатны ўезд у краіну для наведвальнікаў спартыўных і культурных мерапрыемстваў, але пакуль гэтую магчымасць маюць толькі трэнеры і спартсмены, але не балельшчыкі. Анастасія Салановіч, БелаПАН