Хронікі рэпрэсій. Затрыманні ў вёсках, блогера этапавалі ў Магілёў

Сабралі навіны пра пераслед беларусаў за 4 верасня.

У Маларыцкім раёне затрымалі вяскоўца — галоўнага агранома адной з гаспадарак Яна Габіса. У «пакаяльным відэа» ён распавёў, што быў падпісаны на «экстрэмісцкія» тэлеграм-каналы, а таксама нібыта прайшоў рэгістрацыю ў плане «Перамога».

Затрымалі жыхара вёскі Быстрыца Кобрынскага раёна Дзмітрыя Крыцкага.

Паводле праўладных каналаў, мужчына ў 2020 годзе ўдзельнічаў у акцыях пратэсту, быў падпісаны на «экстрэмісцкія» тэлеграм-каналы, а таксама пакідаў у іх абразлівыя каментары.

Дырэктарцы і галоўнай рэдактарцы БелаПАН Ірыне Леўшынай падоўжылі тэрмін утрымання пад вартай да 28 верасня, піша «Позірк».

Нагадаем, Леўшыну, а таксама былога дырэктара кампаніі Дзмітрыя Наважылава затрымалі 18 жніўня 2021 года.

Яны праходзяць па «справе БелаПАН» з былым намеснікам дырэктара кампаніі медыяменеджарам Андрэем Аляксандравым і Ірынай Злобінай, якіх затрымалі 12 студзеня 2021 года.

Затрыманаму напярэдадні праваабаронцу Уладзіміру Целепуну не перадаюць лекі.

Родныя мужчыны хацелі перадаць яму лекі, аднак супрацоўнікі адмовіліся іх узяць. У выніку Уладзімір прапусціў час прыёму лекаў ад ціску.

Акрамя таго, Уладзіміру, як і іншым палітычным, не даюць ні матраца, ні коўдры.

У мазырскім РАУСе яго ўтрымліваюць амаль суткі.

Палітзняволенага Instagram-блогера Сяргея Сакаўца перавялі ў магілёўскую калонію. Мужчыну 25 траўня асудзілі да чатырох гадоў калоніі. Яго прызналі вінаватым па трох крымінальных артыкулах. Сяргей на судзе віну не прызнаў і заявіў пра збіццё пры затрыманні.

Яго затрымалі 21 верасня мінулага года і арыштавалі на 10 сутак. Пазней супраць яго распачалі крымінальную справу паводле «народнага» артыкулу 342 КК за ўдзел у акцыях пратэсту пасля выбараў. Потым яму выставілі абвінавачанне яшчэ па двух артыкулах: паклёп і абраза Лукашэнкі (ч. 1 і 2 арт. 367 і ч. 1 і 2 арт. 368).

Стала вядома, што ўчора яго этапавалі  ў магілёўскую калонію № 15.

Палітвязня Вячаслава Смірнова, які цяпер адбывае тэрмін на «хіміі» ў Мінску, адміністрацыя ПУАТ-55 збіраецца змясціць у штрафны ізалятар тэрмінам на 10 сутак. Прычына спагнання пакуль невядомая, паведамляюць праваабаронцы.

Нагадаем, у судзе Ляхавіцкага раёна 27 кастрычніка 2021 года вынеслі прысуд бацьку і сыну Генадзю і Вячаславу Смірновым, якіх абвінавацілі ў абразе Лукашэнкі (ч. 1 арт. 368 Крымінальнага кодэкса), а Генадзя — яшчэ і ў супраціве супрацоўніку органаў унутраных спраў (ч. 2 арт. 363 Крымінальнага кодекса). У выніку Генадзя асудзілі да 2,5 гадоў калоніі, а Вячаслава — да 2 гадоў «хіміі».

Тэрмін Вячаслаў з 8 студзеня адбывае ў папраўчай установе № 55 у Мінску.