Хто і з чаго страляў на вуліцы Сурганава ў Мінску

13 кастрычніка, у аўторак, на скрыжаванні вуліц Сурганава і Кузьмы Чорнага ў Менску адбылася дзіўная гісторыя. Невядомыя ў балаклавах, бронекамізэльках і шлемах пагналіся за хлопцам, і ў адзін момант прагучаў стрэл. Эпізод трапіў на відэа, і 42.TUT.BY паспрабаваў разабрацца, хто і з чаго мог страляць.

Каля адзінаццаці гадзін вечара 13 кастрычніка ў Telegram-канале "Nexta" з'явілася відэа, знятае, па словах адміністратара канала, за паўгадзіны да гэтага. У тлумачэнні было пазначана, што інцыдэнт адбыўся на скрыжаванні Сурганава і Кузьмы Чорнага. Прычым, па словах аўтара, невядомыя стралялі з пісталета.

Пазней "Еўрарадыё" знайшло героя падзей — ім аказаўся нейкі М., студэнт трэцяга курса Мінскага дзяржаўнага політэхнічнага каледжа. Ён распавёў, што пераходзіў дарогу, калі «нешта ўляцела ў спіну». Хлопец павярнуўся і ўбачыў, па яго словах, амапаўцаў. "Хоць, як мне пасля сказалі, гэта былі не амапаўцы, а ГУБАЗіК», — дадаў ён.
Пасля гэтага, працягнуў М., яго хацелі затрымаць і ўжо пачалі даставаць белыя сцяжкі, «каб рукі завязаць». "Я чамусьці пачаў уцякаць, нават сам не ведаю, чаму. А яны пачалі страляць», — сказаў суразмоўца "Еўрарадыё".
Пасля прэс-служба МУС дала каментар выданню Sputnik. «Былі зроблены два папераджальныя стрэлы халастымі патронамі ўверх», — распавяла афіцыйны прадстаўнік МУС Вольга Чамаданава.
Па яе словах, хлопец не цікавіў міліцыю зусім, яго не затрымлівалі. А папераджальную стральбу адкрылі, каб супакоіць агрэсіўна настроеную групу, якая заблакавала дарогу і замінала руху міліцэйскага транспарту.

Што ўдалося заўважыць на відэа

Якасць відэа, якое з'явілася ў Telegram, пакідае жадаць лепшага. Мы паспрабавалі трохі павысіць яго з дапамогай нейрасеткі, але паляпшэнне аказалася нязначным. Нумар мікрааўтобуса, з якога выскачылі невядомыя ў брані і са зброяй, так і застаўся невядомым. Аднак сёе-тое ўдалося заўважыць: https://tutby.gcdn.co/n/360_foto_video/0d/9/neizvestnye_strelyayut_v_storonu_ubegayushchego_muzhchin...
Па-першае, агрэсіўна настроенай групы, якая заблакавала дарогу, на відэа не відаць. Людзі ў брані перабягалі дарогу ўслед за хлопцам. Калі б ім патрабавалася разагнаць або затрымаць тых, хто блакуе дарогу, то гэта дзеянне проста не мела б сэнсу — у такім выпадку яны б рухаліся ўздоўж, а не папярок шашы.
Па-другое, адміністратар канала Nexta відавочна памыліўся, заявіўшы, што стралялі з пісталета. З-за нізкай якасці відэа дакладную мадэль зброі, з якога быў выраблены стрэл, вызначыць цяжка — аднак гэта відавочна не пісталет, а нешта з доўгім ствалом, і чалавек страляе ад пляча, трымаючы зброю двума рукамі.
Давайце разбірацца. З даўгаствольных мадэляў у сілавікоў маюцца ў асноўным драбавік і аўтаматы, у адзінкавых колькасцях — гранатамёты ГМ-94. Апошні мы выключаем адразу, пры стральбе з такіх заўсёды адбываецца вельмі яркая ўспышка, якую ні з чым не пераблытаеш.
Застаецца альбо драбавік, альбо аўтамат Калашнікава. У далейшым вызначэнні нам дапаможа відэа, знятае 12 кастрычніка на Лагойскім тракце. Там захаваны вельмі падобны момант — такі ж белы Mercedes Sprinter з жоўтымі нумарамі маршрутнага таксі, з якога выходзяць людзі ў цывільным адзенні і сродках індывідуальнай бронеаховы.
Адзін з сілавікоў, апрануты ў цёмную кофту, джынсы і белыя красоўкі, трымае ў руках аўтамат АКС-74 з асадкай для халастой стральбы. Калі паглядзець на сілавіка, які робіць стрэл на Сурганава (момант, калі ён бяжыць у святле фар аўтамабіля таксі) , то можна ўбачыць сапраўды такую ж вопратку.

Значна лепш, чым зброя, бачная экіпіроўка, у якую апрануты страляў. Гэта ўжо знаёмая нам бронекамізэлька-модульная балістычная сістэма MBS-X, такія носіць эліта сілавога блока — байцы "Альфы" і афіцэрскага атрада 5-й брыгады ССА з Мар'інай горкі. Шлемы ЛШЗ 1 + таксама выкарыстоўваюцца 5-й брыгадай, "альфаўцы" носяць іншыя шлемы — мадэлі "Спартанец", напрыклад, у такім у канцы жніўня засвяціўся 15-гадовы Мікалай Лукашэнка.
Таму, верагодна, на кадрах быў баец ССА (варыянт, што такую форму проста так аддаюць староннім людзям, мы не разглядаем — яна вельмі дорага каштуе) з аўтаматам АКС-74 з прыладай для халастой стральбы. Але ці з'яўляецца гэты чалавек тым жа, якога знялі на Лагойскім тракце, мы не ведаем.