Як найміты расейскай ПВК трэніравалі беларускіх дзяцей на беларускай базе

Пачынаючы з 2008 года, на тэрыторыі 969 вайсковае базы рэзерва танкаў каля мястэчка Ўрэчча ў Менскай вобласьці штогод праводзіцца ваенна-патрыятычны лагер для падлеткаў «Патрыёт». У якасьці інструктараў там зь дзецьмі займаюцца прадстаўнікі прарасейскае парамілітарнае групоўкі «Казачы спас». І, як высветлілася, найміты «Вагнера».

Ініцыятарам стварэньня лагера называе сябе протаіерэй БПЦ Алянсандр Драгун. Настаяцель Сьвята-Мікалаеўскай царквы ва Ўрэччы Аляксандр Драгун займае царкоўныя пасады з 1996 года, да таго ён служыў ва ўнутраных войсках.

З боку афіцэраў вайсковае базы правядзеньне лагераў курыраваў тагачасны намеснік камандзіра базы па ідэялагічнай працы падпалкоўнік Генадзь Карака. Ён ў 1992 годзе скончыў Свярдлоўскае вышэйшае ваенна-палітычнае танка-артылерыйскае вучылішча ў расейсім горадзе Екатэрынбург. У 2018 годзе, калі Генадзь Карака ўжо перайшоў працаваць у Менскае кадэцкае вучылішча намеснікам дырэктара па выхавальнай працы, месцам правядзеньня стала ўказвацца стала ўказвацца Менскае кадэцкае вучылішча. А калі ён у 2021 годзе зайняў пасаду кіраўніка ваенна-патрыятычнага выхаваньня ў сярэдняй школе нумар 2 ва Ўрэччы, месцам правядзеньня лагера «Патрыёт» пачала ўказвацца згаданая школа. Пры гэтым фактычным месцам, дзе адбываюцца трэніроўкі падлеткаў, дагэтуль застаецца тэрыторыя 969 вайсковае базы.

Папярэдні слайдНаступны слайд

Інструктары пры ўдзеле вайскоўцаў займаюцца з падлеткамі агнявой, тактычнай, страявой і медыцынскай падрыхтоўкай, асновамі тапаграфіі. Аб тым, чым напаўняюць галавы дзяцей падчас правядзеньня лагераў «Патрыёт», сьведчыць распарадак дня на першыя два дні знаходжаньня ў лагеры ў ліпені 2024 года, разьмешчаны на старонцы школы ва Ўрэччы: ў першы дзень — паўгадзіны на «духоўна-маральнае выхаваньне», паўтары гадзіны на «грамадзянска-патрыятычнае выхаваньне», і кожны дзень з 20:15 да 21:00 — прагляд тэлепраграмы афіцыйных навінаў.

Апроч навучэньня вайсковым дысцыплінам, да падлеткаў перыядычна прыязджаюць супрацоўнікі міліцыі з распавядамі аб сваёй працы.

Гэтая гісторыя з ваенна-патрыятычнымі лагерамі «Патрыёт» прыкметная ня толькі тым, што на тэрыторыі дзейнае вайсковае часткі беларускае арміі трэніруе дзяцей прарасейская ваенізаваная групоўка, але і адной абставінай, якая высьветлілася ў працэсе вывучэньня здымкаў.

У расповедзі пра лагер «Патрыёт», які праводзіўся з 10 да 19 жніўня 2013 года, гаворылася, што інструктарамі зьяўляліся тры прадстаўнікі «Казачага спаса». Але на здымку 6 ад 2013 года бачныя чатыры чалавекі, якія стаяць ля ўваходу ў адзін з будынкаў вайсковае часткі. На здымку 7 бачныя тыя ж чатыры чалавекі, якія стаяць у памяшканьні.

Папярэдні слайдНаступны слайд

Другі справа на здымку 7 — Пётр Шапко, кіраўнік «Казачага спаса». Першы зьлева — Андрэй Асбестаў (магчыма, гэта псэўданім), які таксама належыць да казакоў, і які, як бачна зь іншых здымкаў, таксама праводзіў заняткі з падлеткамі. Малады хлопец, што стаіць першым справа — гэта, хутчэй за ўсё, трэці інструктар «Казачага спаса». А вось чалавек, які стаіць паміж Шапко і Асбеставым — вельмі цікавая асоба.

Здымкі, на якіх ён перыядычна зьяўляецца падчас правядзеньня лагераў «Патрыёт», дазволілі ідэнтыфікаваць ягоны акаўнт у сацсетцы «ўкантакце». Імя ўладальніка акаўнта ўказана як «Влад Имир», таму меркавана ён мае імя Ўладзімір. У інфармацыі аб сабе «Ўладзімір» указаў, што служыць у 10-й асобнай брыгадзе спецпрызначэньня ГРУ ГШ Расеі, а месцам жыхарства ўказаў вёску Молькіна Краснадарскага края.

Маецца здымак, на якім «Ўладзімір» стаіць побач зь іншым баявіком, які ў сваім акаўнце «ўкантакце» разьмясьціў скрыншот кантракта з расейскай ПВК «Славянскі корпус». 

«Славянскі корпус», які называюць папярэднікам ПВК «Вагнэр», быў зарэгістраваны з назвай «Slavonic Corps Limited» двома расейцамі ў Ганконзе ў студзені 2012 года. У верасьні 2013 года ўдзельнікі «Славянскага корпуса», якіх набралося 270 чалавек, былі накіраваныя ў Сірыю для дапамогі Башару Асаду. Дарэчы, ў матар'яле, падрыхтаваным Украінскім цэнтрам аналітыкі і бясьпекі, згадваецца, што частка баявікоў была перавезеная з Пецярбурга ў Сірыю празь Менск.

18 кастрычніка 2013 года, калі адбылося першае сутыкненьне гэтай групы баявікоў з праціўнікам, яны пацярпелі паразу і іх хутка вывезьлі ў Расею. Пасьля асноўная частка «Славянскага корпуса» ўлілася ў створаную ў 2014 годзе ПВК «Вагнэр».

Знайшліся і іншыя доказы належнасьці гэтага чалавека да «Славянскага корпуса». У дыскусіі пад артыкулам на старонцы topwar.ru разьмешчаны здымак, на якім ён прысутнічае, ідэнтычны (ня лічачы заблюранага твару) здымку 10, і сказана, што гэта «супрацоўнік Slavonic Corps Limited».

Падчас правядзеньня ваенна-патрыятычных лагераў «Патрыёт» гэты «Ўладзімір» заўважаны прынамсі ў 2013, 2014 і 2015 гадах.

Папярэдні слайдНаступны слайд

Такім чынам, пранікненьне «рускага міру» да беларускіх школьнікаў пачалося задоўга да таго, як яно стала «мэйнстрымам». Тыя, каго вучылі гэтыя «інструктары» ў 2013-2014 гадах, ужо сталі дарослымі людзьмі. І таму не вельмі зьдзіўляюць паведамленьні, якія раз-пораз зьяўляюцца ў нашай інфармацыйнай прасторы пра тое, што «беларус загінуў у вайне ва Украіне з расейскага боку». Гэта і ёсць вынік выхаваньня беларускіх дзяцей расейскімі парамілітарнымі ўтварэньнямі.