Кіраўнік СК сказаў, чаму судзяць віцяблянку, у якой дзіця памерла пры родах

Кіраўнік Следчага камітэта Іван Наскевіч пракаментаваў справу віцяблянкі, якую судзяць за смерць дзіцяці пры хатніх родах. Следчыя кваліфікавалі яе дзеянні як «прычыненне смерці па неасцярожнасці».

Журналісты пацікавіліся, чаму ў Віцебску пасля смерці нованароджанага немаўляці на маці пачалі крымінальную справу, а ў Мядзеле следчыя будуць праводзіць праверку, толькі калі сваякі звернуцца з заявай.
«Гэтыя гісторыі зусім розныя. Праверка па Мядзелю яшчэ не завершана, і мы не маем права даваць канчатковую ацэнку. Што датычыць віцебскай гісторыі, то ў нас не было ніякіх сумневаў у наяўнасці прыкмет складу злачынства ў дзеяннях маці», — перадае tut.by словы Наскевіча.
Кіраўнік Следчага камітэта падкрэсліў, што віцяблянку неаднаразова папярэджвалі, што ў яе могуць узнікнуць складанасці пры родах, але яна адмовілася станавіцца на ўлік і класціся ў шпіталь. "Пасля родаў ёю не былі прынятыя правільныя меры, якія б прынялі кваліфікаваныя медык, акушэрка або доктар. Менавіта таму інцыдэнт быў кваліфікаваны як прычыненне смерці па неасцярожнасці", — заявіў Наскевіч. Ён выказаў меркаванне, што суд падтрымае меркаванне следчых.
Мядзельскую гісторыю са смерцю немаўляці праз некалькі гадзінаў пасля родаў старшыня Следчага камітэта каментаваць не стаў: «Як толькі будзе рашэнне па ёй, мы патлумачым, чаму ў адной сітуацыі падыход адзін, а ў другой — іншы. І паверце, у дзвюх сітуацыях рашэнне будзе абсалютна законным».
У Віцебску цяпер ідзе закрыты суд над жанчынай, чыё дзіця захлынулася каляплоднымі водамі і памерла пры родах. Максімальная кара, якая ёй пагражае, тры гады пазбаўлення волі. 
Паводле euroradio.fm