Комлік — міліцыі: «Хачу ўступіць у валоданне загарадным домам і кватэрай на 84 тысячы еўра»

Абвінавачаны па "справе прафсаюзаў" галоўны бухгалтар прафсаюза РЭП Ігар Комлік накіраваў у ГУУС Мінгарвыканкама скаргу на адмову ва ўзбуджэнні крымінальнай справы за паклёп у дачыненні да сайта belnovosti.by.

21 траўня сайт апублікаваў артыкул «Фіктыўны РЭП Фядыніча», у якім гаворыцца, што шляхам крадзяжоў Ігар Комлік набыў нерухомую маёмасць: загарадны дом і кватэру на агульную суму ў 84 тысячы еўра ў 2015 годзе.
Ігар Комлік 28 траўня накіраваў у пракуратуру Цэнтральнага раёна Мінска заяву аб узбуджэнні крымінальнай справы ў дачыненні да сайта belnovosti.by, які належыць УП «Медыя Навіны». Пракуратура накіравала заяву начальніку УУС адміністрацыі Цэнтральнага раёна Мінска палкоўніку міліцыі А. Шахлаю.
Адказ прыйшоў 23 чэрвеня. УУС адміністрацыі Цэнтральнага раёна Мінска паказвае, што ў выніку праверкі ўстаноўлена:
«Дастаткова дакладных фактаў, якія паказваюць на тое, што апублікаваная артыкул утрымлівае паклёпніцкія здагадкі аўтара, не ўстаноўлена».
Ігар Комлік абскардзіў рашэнне па некалькіх падставах, піша praca-by.info.
Па-першае, у час «праверкі» Ігара Комліка ніхто не выклікаў і не пытаўся. Па-другое, Ігар Комлік і не хавае, што ў дачыненні да яго ўзбуджаная крымінальная справа.
— Рашэння суда яшчэ не было, а прэзумпцыю невінаватасці яшчэ ніхто не адмяняў. Нават па сфабрыкаванай крымінальнай справе мне з Фядынічам інкрымінуецца нібыта нявыплата падаткаў на сумму каля 11 тысяч долараў ЗША, а аўтар артыкула падводзіць грамадскую думку да таго, што я здзяйсняў крадзяжы ў асабліва буйным памеры — 84 тысячы еўра, а на атрыманыя грошы я набываў нерухомую маёмасць, пра што ў справе, накіраванай у суд, няма нават намёку, — абураны Ігар Комлік.

— Ну і трэцяе, самае важнае. Паколькі УУС Цэнтральнага раёна Мінска не выявіла «дастаткова дакладных фактаў, якія паказваюць на тое, што апублікаваны артыкул утрымлівае паклёпніцкія здагадкі аўтара», значыць, у мяне павінна быць «набытая ў 2015 годзе нерухомая маёмасць, аб якой я нічога не ведаю, але пра якую добра вядома аўтару артыкула і работнікам УУС. Таму я і кажу, што хачу ўступіць у валоданне гэтай маёмасцю і прашу паказаць мне яе месца размяшчэння і падаць праваўстанаўліваючыя дакументы, — каментуе Ігар Комлік.
Фігурант "справы прафсаюзаў" мяркуе, што службовыя асобы, які далі адказ, альбо некампетэнтныя, альбо праявілі халатнасць і бяздзейнасць.
Ігар Комлік просіць прыняць меры дысцыплінарнага ўздзеяння да службовых асоб УУС адміністрацыі Цэнтральнага раёна і распачаць крымінальную справу ў дачыненні да асоб, вінаватых у распаўсюдзе паклёпу.