Лекарка РНПЦ дзіцячай анкалогіі Юлія Жаранкова выйшла на волю

Лекарка Юлія Жаранкова знаходзіцца на волі, паведамляе «Панацэя». Яе выпусцілі яшчэ ўчора пасля апытання ў якасці сведкі. Паводле якой справы жанчынай цікавіліся сілавікі, невядома.

Доктар Рэспубліканскага навукова-практычнага цэнтра дзіцячай анкалогіі, гематалогіі і імуналогіі Юлія Жаранкова была затрыманая 8 ліпеня супрацоўнікамі КДБ.

Юлія з'яўляецца старшынёй адной з яго пярвічак, якая ўваходзіць у структуру галіновай прафсаюзнай арганізацыі «Панацэя» (а яна з'яўляецца членам міжнародных прафсаюзаў EPSU і PSI).

Юлія Жаранкова — дзіцячы гематолаг і імунолаг з 12-гадовым вопытам. Яна не раз з'яўлялася ў публікацыях дзяржаўных СМІ і на радыё, а ў красавіку гэтага года выступала з відэалекцыяй на рэспубліканскай канферэнцыі пацыентаў з першаснымі імунадэфіцытамі. Акрамя РНПЦ, Юлія працуе ў медцэнтры «Нардзін».

Учора быў затрыманы яшчэ адзін супрацоўнік РНПЦ-ДАГІ — загадчык лабараторыі генетычных біятэхналогій Аляксандр Мялешка. Ён раней, як і Жаранкова, уваходзіў у кіраўніцтва пярвічкі СПБ у РНПЦ. Мялешка —кандыдат медыцынскіх навук, мае больш за 20 гадоў стажу.

Аляксандру Мялешку ў выніку прысудзілі 10 сутак адміністрацыйнага арышту.