Сям’ю Шарэндаў з Брэста выклікаюць у Следчы камітэт
Сям’ю Шарэндаў выклікаюць у Следчы камітэт. Паліна і Андрэй былі аднымі з лідараў мясцовых акцый пратэсту супраць дэкрэта «аб дармаедстве».
Адпаведныя позвы мясцовыя актывісты апазіцыі знайшлі ў шчыліне дзвярэй кватэры, у якой яны пражываюць.
Падрабязней распавёў Андрэй Шарэнда:
— Увечары пагрукаліся ў дзверы і прадставіліся, што яны на Следчага камітэта. Жонка не адчыніла, і тады позву ўсунулі ў шчыліну паміж дзвярыма. У позве было пазначана, што мы запрашаемся ў якасці сведак па крымінальнай справе ў Следчы камітэт у Брэсце. Па якой крымінальнай справе — пакуль не зразумела. Мы ніякіх законаў не парушалі, таму я лічу, што гэта выключна палітычныя справы. Супраць шмат якіх актывістаў распачынаюць крымінальныя справы на роўным месцы. Тут можа быць толькі палітыка.
Згодна позвы, Андрэй Шарэнда мусіць з’явіцца ў Следчы камітэт а 12-й, а ягоная жонка Паліна а 14-й гадзінах.
«Перш чым ісці туды, спачатку патэлефануем у дадзеную ўстанову, каб даведацца па якой справе нас выклікаюць як сведак, і ўжо тады прымем нейкае рашэнне», — адзначыў Андрэй Шарэнда. Паліна і Андрэй былі аднымі з лідараў мясцовых акцый пратэсту супраць дэкрэта «аб дармаедстве».
