Магілёў: рамонт у Доме культуры за 5 млн долараў

Да V Форуму рэгіёнаў Беларусі і Расіі кінутыя ўсе сілы і грошы – магілёўскія ўлады дзейнічаюць выключна ў інтарэсах гэтага мерапрыемства. Спецыяльна для гэтага на рамонт Дома культуры вобласці пакінута амаль 5$ млн. долараў – будынак павінен стаць асноўнай базай для Форуму.

Мяркуючы па аб’яве на сайце дзяржзакупак, гасцей з Расіі вельмі хочуць здзівіць раскошай, звяртае ўвагу mspring.online: Упраўленне капітальнага будаўніцтва (УКБ) закупляе адразу два элітных камплекты мэблі для хола.
У яго ўваходзяць кутняя канапа і круглы часопісны столік з масіва дрэва і скуры. За два камплекты УКБ гатовы аддаць 20 тысяч рублёў – па 10 тысяч за кожны (5$ тыс).
Але і гэта яшчэ не ўсё – для абласнога Дома культуры закупляюць яшчэ і 31 канапу для адпачынку за 30 тысяч рублёў.
Усяго УКБ гатовы выдаткаваць на мяккую мэблю суму эквівалентную кошту двухпакаёвай кватэры ў Магілёве – 50 тысяч рублёў або 25$ тысяч.
Усе работы павінны быць завершаны да восені гэтага года. Форум рэгіёнаў пачынаецца ўжо ў кастрычніку. Мясцовыя ўлады разлічваюць, што арганізацыі, прадпрыемствы і рэгіёны заключаць на форуме новыя камерцыйныя кантракты і пагадненні на суму ў больш за $ 400 млн. У Магілёў на мерапрыемства таксама чакаюць кіраўнікоў Расіі і Беларусі Уладзіміра Пуціна і Аляксандра Лукашэнку.
Нагадаем, што на ўскрайку Магілёва ўжо год вядзецца будаўніцтва Трыўмфальнай аркі. Чакаецца, што ў  менавіта па гэтай дарозе праедзе картэж высокіх гасцей — удзельнікаў Пятага форуму рэгіёнаў Беларусі і Расіі. Каштарысны кошт магілёўскай Трыўмфальнай аркі складае каля двух мільёнаў долараў. У канцы траўня незадаволеныя мясцовыя бізнесмены выклалі ў сацсетках ліст, у якім па даручэнні старшыні гарвыканкама Уладзіміра Цумарава ім настойліва рэкамендуецца "разгледзець магчымасць аказання спонсарскай дапамогі на будаўніцтва аркі на Мінскай шашы".