Міліцыя пераследуе журналістку-фрылансерку «Радыё Рацыя»

Сёння вядомы па рэпрэсіях у Глыбокім маёр міліцыі Сяргей Цырбан прыйшоў да журналісткі-фрылансеркі Таццяны Смоткінай, якая супрацоўнічае з «Радыё Рацыя».  

Ён паведаміў, што супраць Смоткінай вядзецца адміністрацыйны працэс, і выклікаў жанчыну ў міліцыю на 10 жніўня, каб скласці пратакол за «незаконны выраб прадукцыі СМІ».
«Я разумею, што гэта чарговы ціск на мяне, каб з'язджала, бо ўжо было некалькі намёкаў (машына пад домам, ператрус па надуманай справе і г.д.). Але я вырашыла, што буду, як кажуць, трываць да апошняга, бо лічу, што нічога не парушала. Парушаюць законы зараз іншыя, а праўда — за намі. І я ўпэўненая, што хутка ўсё стане на свае месцы», — сказала Таццяна Смоткіна ў размове з «Белсатам».
Нагадаем, што раней улады Глыбокага актыўна прэсавалі супрацоўніка «Белсата» Змітра Лупача. Журналіста нават вывезлі з санаторыя, дзе ён адпачываў, у ІЧУ. Пазней ён з'ехаў з краіны. На сённяшні дзень Таццяна Смоткіна, фактычна, адзіная незалежная журналістка ў Глыбокім.