Мінабароны РБ закупляе аптэчкі «лепш за НАТАўскія». Але на ўсіх не хопіць

Паводле даных партала дзяржзакупак, Міністэрства абароны Беларусі плануе закупіць 2400 індывідуальных аптэчак за 880 000 BYN ($298 994). Такім чынам, адна аптэчка павінна абысціся ў 366,6BYN ($124,5).

У аўкцыённых дакументах пазначана, што аптэчкі павінны быць новымі, вырабленымі не раней за 2023 год і мець рэгістрацыю ў Міністэрстве аховы здароўя Беларусі, адзначае «экстрэмісцкі» тэлеграм-канал журналіста, якога ўсе прасілі па дапамогу. 

Пастаўка аптэчак павінна адбыцца з 6 чэрвеня па 30 ліпеня ва ўстанову «2335 база захоўвання медыцынскіх тэхнікі і маёмасці УС РБ».

Раней (у 2021 і 2022 гадах) МА РБ двойчы закупляла тавары з назвай «Аптэчка першай дапамогі індывідуальная» па 1000 штук. Аптэчкі ўзору 2021-2022 гадоў каштавалі ў 8 разоў танней, чым у 2023 годзе. Прычына таму — прынцыпова рознае змесціва гэтых аптэчак. У цэлым можна канстатаваць значны прагрэс у напаўненні індывідуальных аптэчак.

Так, у аптэчках, якія закупляюцца ў 2023 годзе, у больш чым два разы вырасла колькасць кампанентаў, якія ўваходзяць у яе склад. У склад новых аптэчак былі ўключаны:

• Ампульніца пластыкавая
• Бінт медыцынскі стэрыльны 5 м х 10 сс; бінт медыцынскі стэрыльны 7 м×14 см
• Паветравод медыцынскі надгартаны
• Даксіцыклін 100 мг № 10
• Жгут медыцынскі кроваспыняльны турнікетнага тыпу ў чахле
• Кампрэсійная бандаж-павязка
• Лейкапластыр медыцынскі 5 м×2 см
• Лаперамід гідрахларыд 2 мг № 10
• Маркер нязмыўны
• Нажніцы для разразання павязак
• Коўдра тэрмаізаляцыйная
• Пальчаткі медыцынскія
• Піралгін № 10
• Павязка (пластыр) аклюзійная аплікацыйная
• Прамедол 2% — 1 мл у шпрыц-цюбіку
• Сурвэткі нашатырныя
• Сродак гемастатычны стэрыльны на бінце на аснове хітазану (даўжынёй не меней 1 м)
• Хлоргексідзіна біглюканат 40 мл

У сваю чаргу, з новых аптэчак прыбралі наступныя кампаненты, якія прысутнічалі ў аптэчцы ўзору 2021-2022 гадоў:

• Пакет супрацьхімічны індывідуальны
• Сродак для абеззаражання вады індывідуальны

Нагадаем, што даручэнне пра распрацоўку індывідуальнай аптэчкі «лепш за НАТАўскую» Лукашэнка выдаў у кастрычніку 2022 года. А ў студзені 2023 года буйная партыя індывідуальных аптэчак новага ўзору была перададзеная расійскім вайскоўцам. Таксама ў канцы лютага паведамлялася, што вайскоўцы 103-й паветрана-дэсантнай брыгады атрымалі 1000 індывідуальных аптэчак новага ўзору.

Як і з закупкай турнікетаў, колькасць індывідуальных аптэчак, якія закупляюцца, паказвае, што УС РБ пакуль у стане забяспечыць імі толькі невялікую частку вайскоўцаў. Па розных даных, агульная колькасць УС РБ складае ад 65 да 70 тысяч чалавек (з іх вайскоўцаў — ад 45 да 48 тысяч).

2400 новых аптэчак — гэта мізер для беларускай арміі. Пры гэтым, бюджэт гэтага году прадугледжвае выдачу на абарону і ўзброеныя сілы — 2,635 млрд рублёў, а на забеспячэнне мабілізацыйнай падрыхтоўкі і мабілізацыі — 110,5 млн рублёў. У параўнанні з бюджэтам-2022 абаронныя выдаткі былі павялічаныя на 960 млн рублёў, у тым ліку на ўзброеныя сілы — на 930 млн рублёў.

Чаму ж купляецца так мала аптэчак? Няўжо жыццё вайскоўцаў не мае каштоўнасці?