Мінчука, у якога на Новы год страляў міліцыянт, прысудзілі да 5 год абмежавання волі

У судзе Маскоўскага раёна Мінска абвешчаны прысуд 29-гадоваму супрацоўніку заводу «Керамін» Андрэю Гаўрашу, які ў навагоднюю ноч на парозе ўласнай кватэры быў паранены міліцыянтам Русланам Салаўёвым.

Ён пакараны так званай «хіміяй» — абмежаваннем волі тэрмінам на 5 гадоў. Раней пракурор Алена Крупеніна папрасіла прызначыць Гаўрашу 3 гады пазбаўлення волі. У сваю чаргу, Адвакат Юлія Станкевіч папрасіла апраўдаць свайго падабароннага.

Пацярпелы сяржант міліцыі Руслан Салаўёў папрасіў прызначыць Андрэю Гаўрашу пакаранне, не звязанае з пазбаўленнем волі. Гаўроша вызвалілі з-пад варты ў залі суду, ён будзе пастаўлены на адмысловы ўлік.

Міліцыянт распавёў на судзе пра абставіны сутычкі паміж ім і абвінавачаным ў навагоднюю ноч, пра тое, як і чаму страляў у Гаўраша з табельнага пісталета, і што адбывалася з ім у пад’ездзе дому і ў міліцэйскім аддзяленні пасля інцыдэнту. Бацька Гаўраша не паверыў ніводнаму слову міліцыянта.

Колішні следчы пракуратуры Фрунзенскага раёна Мінску, а цяпер праваабаронца Алег Волчак адзначаў, што міліцыянт страляў ва ўпор у жыццёва важныя органы чалавека, не рабіў папераджальнага стрэлу, а ў Гаўраша ў руках не было прадметаў, якія пагражалі б жыццю супрацоўніка міліцыі. Пры стрэле ў спіну, кажа Волчак, немагчыма гаварыць пра самаабарону, і гэта сведчыць за тое, што агнястрэльная зброя ўжытая неправамерна да бяззбройнага чалавека.

www.svaboda.org