«Мы не ведалі адзін аднаго да гэтага лета». Адбылася прэм'ера фільма пра пратэсты ў Беларусі

Увечары 8 лютага на канале «Настоящее Время» адбылася прэм'ера дакументальнага фільма Вольгі Абрамчык «Мы не ведалі адзін аднаго да гэтага лета» аб масавых пратэстах у Беларусі. Фільм паказали ў эфіры праграмы «Рэальнае кіно», а ўжо сёння ён з'явіўся ў ютубе.

Фільм распавядае пра падзеі, якія адбыліся ў дзень выбараў прэзідэнта Беларусі — 9 жніўня 2020 года — і ў першы тыдзень пасля іх.

Фільм змантаваны выключна з кадраў, якія былі зняты ўдзельнікамі і відавочцамі акцый пратэсту. Іх дасылалі ў рэдакцыю тэлеканала «Настоящее Время», беларускай службы «Радыё Свабода» і тэлеграм-каналаў «Мая краіна Беларусь» і «Беларусь галаўнога мозгу».

Вольга Абрамчык — малады дакументаліст з Беларусі і журналістка «Настоящего Времени». Пасля заканчэння Беларускай акадэміі мастацтваў яна атрымала стыпендыю на навучанне ў Чэхіі. Вось ужо пяць гадоў яна жыве і працуе ў Празе. Падчас жнівеньскіх пратэстаў на радзіме рэжысёрка апынулася пад замком на каранціне.