Наступствы COVID-19: бальніцы Гомельшчыны закупілі ў тры разы больш патолагаанатамічных мяшкоў

Амаль з самага пачатку пандэміі беларускае Міністэрства аховы здароўя не публікуе звестак аб захворванні і смяротнасці ў выніку COVID-19 у разрэзе рэгіёнаў. Ідзе ўжо трэцяя дэкада сакавіка, а Белстат дагэтуль не апублікаваў звесткі аб смяротнасці за 2020 год. Ва ўмовах вакууму афіцыйнай інфармацыі «Флагшток» распачаў чарговую спробу высветліць маштаб наступстваў пандэміі для Гомельскай вобласці, абапіраючыся выключна на звесткі з адкрытых крыніц.

Выданне звярнула ўвагу на дадзеныя электроннай сістэмы дзяржаўных закупак, дзе бальніцы Гомельскай вобласці публікуюць заяўкі на набыццё патолагаанатамічных мяшкоў.

Як патлумачылі спецыялісты — работнікі бальніц, гэтыя мяшкі, згодна з новым санітарнымі патрабаваннямі, выкарыстоўваюцца пры транспарціроўцы пацыентаў, якія памерлі ў шпіталі. Такім чынам, колькасць закупляемых мяшкоў ўскосна і з пэўным часовым лагам сведчыць аб колькасці смерцяў у сценах бальніц.

Звядзенне дадзеных за апошні год прывяло да несуцяшальных высноў: колькасць памерлых у бальніцах за апошні год павялічылася амаль у тры разы.

У красавіку 2020 года, адразу пасля пачатку пандэміі, бальніцы рэгіёну закупілі 455 патолагаанатамічных мяшкоў. Гэтых запасаў хапіла да канца квартала: за наступныя два месяцы было закуплена толькі 50 мяшкоў.

З канца лета бальніцы зноў пачалі закупляць мяшкі, што можа сведчыць аб пачатку падрыхтоўкі да другой хвалі каронавіруса. Гэтых запасаў хапіла толькі да пачатку лістапада, пасля чаго рушыў услед валападобны рост аб'ёмаў закупкі патолагаанатамічных мяшкоў. Пік закупак прыйшоўся на мінулы люты, калі было набыта 1140 мяшкоў, што склала 43% ад агульнай сумы мяшкоў, закупленых да гэтага.

За апошні год мяшкі закуплялі 15 бальніц Гомельскай вобласці.

Больш за ўсё патолагаанатамічных мяшкоў было закуплена Гомельскім абласным клінічным шпіталем інвалідаў Айчыннай вайны — 870 штук. Прычым у перыяд з лістапада 2020 года па люты 2021 шпіталь кожны месяц адчуваў недахоп і дакупляў мяшкі.

Падобная сітуацыя складваецца ў Мазырскай гарадской бальніцы, дзе асноўны аб'ём закупкі мяшкоў ажыццёўлены таксама ў перыяд з лістапада 2020 па люты 2021 года.

Трэцяе месца па колькасці закупленых патолагаанатамічных мяшкоў займае Калінкавіцкая цэнтральная раённая бальніца. Увесь аб'ём закупляемых мяшкоў раённай бальніцы Калінкавічаў прыйшоўся на люты 2021 года. Улічваючы блізкасць бальніц Мазыра і Калінкавічаў, адзначым, што на гэты Палескі рэгіён прыпадае 36% усіх закупленых патолагаанатамічных мяшкоў Гомельскай вобласці.

З просьбай пракаментаваць статыстыку закупкі патолагаанатамічных мяшкоў «Флагшток» звярнуўся да спецыялістаў гомельскіх бальніц, якія пацвердзілі агульную тэндэнцыю павелічэння смяротнасці ў бальніцах. У той жа час, спецыялісты сыходзяцца ў меркаванні, што рост смяротнасці нельга звязваць выключна з наступствамі COVID-19.

Паводле афіцыйнай статыстыкі Міністэрства аховы здароўя, за ўвесь перыяд распаўсюджвання інфекцыі ў Беларусі памерла 2 тысячы 166 пацыентаў з выяўленай каранавіруснай інфекцыяй.