Невядомыя паведамілі, што замінавалі беларускія амбасады ў Смаленску і Пецярбургу

13 снежня каля 17:00 на электронную пошту аддзяленьня беларускай амбасады ў Санкт-Пецярбургу прыйшло паведамленьне з электроннага адрасу на серверы ў Швейцарыі.

Як паведамляе пецярбурскі сайт konkretno.ru, аўтары паведамленьня заявілі, што «стаміліся трываць дыктатарскі рэжым, узначалены А.Р.Лукашэнкам і ягоным злачынным асяроддзем». Яны запатрабавалі поўнага вызвалення ўсіх палітычных зняволеных і адстаўкі Лукашэнкі. Іначай яны пагражалі падарваць «усе замінаваныя аб’екты» пасля 23:00, паведамляе «Свабода».

Спецыялісты агледзелі памяшканне дыпламатычнага прадстаўніцтва Беларусі на вуліцы Бонч-Бруевіча і прылеглую да яго тэрыторыю, выбуховых прыстасаванняў не знайшлі.

Таксама ў панядзелак такое паведамленне пра міну атрымала беларускае консульства ў Смаленску, але і там не знайшлі выбухоўкі.