Падаражэюць мабільныя званкі і вучоба ў ВНУ, унясуць дапаўненні ў дармаедскі дэкрэт. Змены сакавіка

У Беларусі з 1 сакавіка падвысяць кошт навучання ў некаторых ВНУ, падымуць цэны на асобныя маркі цыгарэт і мабільныя званкі. Акрамя таго, на працягу сакавіка ўлады таксама абяцаюць дапоўніць дэкрэт аб дармаедстве.

FINANCE.TUT.BY паглядзеў, якія змены чакаюць беларусаў у сакавіку і як яны паўплываюць на гаманцы.

Паспець падаць падатковую дэкларацыю

Да 1 сакавіка ўключна некаторым беларусам трэба даць справаздачу аб даходах за мінулы год. Сярод патэнцыйных плацельшчыкаў падатку — тыя, хто прадаваў нерухомасць або некалькі машын, атрымальнікі буйных грашовых падарункаў або замежных пераводаў.
Калі не падаць своечасова дэкларацыю, то можна атрымаць штраф. Да прыкладу, калі маецца сума падатку, якая падлягае выплаце і пратэрміноўка падачы дэкларацыі складае больш чым тры працоўныя дні, то штраф складзе ад двух да дзесяці базавых велічынь (ад 49 да 245 рублёў).
Дарэчы, выплаціць сам падаходны падатак трэба не пазней за 15 траўня.

Вырастуць цэны на некаторыя маркі цыгарэт

З 1 сакавіка ў Беларусі падаражаюць некаторыя маркі цыгарэт. Да прыкладу, цыгарэты гродзенскай тытунёвай фабрыкі «Нёман» NZ breeze з 1 сакавіка будуць каштаваць 1,64 рублі, Pall Mall Red, Pall Mall Blue, Pall Mall Silver, Pall Mall Azure — 2,05 рублі, Pall Mall Nano Blue, Pall Mall Nano Silver, Pall Mall Nano Fresh, Pall Mall Nanokings Blue, Pall Mall Nanokings Silver — 1,9 рублі, Rothmans Blue, Rothmans Blue + — 2,2 рублі.
Нагадаем, у беларускіх тытуннікаў ёсць права кожны месяц ўсталёўваць новыя максімальныя кошты на сваю прадукцыю. У студзені цыгарэты падаражэлі на 3,1%.

Дапоўняць дэкрэт аб дармаедстве

На працягу сакавіка ў абноўлены дакумент аб дармаедстве — дэкрэт № 1 — павінны ўнесці дапаўненні. Так, урад да 1 красавіка 2018 года выпрацуе спіс паслуг, за спажыванне якіх тыя, хто трапіў пад дзеянне дэкрэта, будуць плаціць па эканамічна абгрунтаваным тарыфе. Акрамя таго, будзе вызначана, хто з незанятых у эканоміцы будзе падпадаць пад дзеянне новага ўказа — па заканчэнні якога перыяду няўдзелу ў працы эканомікі.

Падаражэе навучанне ў ВНУ

Беларускі дзяржаўны універсітэт падвышае кошты на навучанне для студэнтаў-платнікаў. Расцэнкі зацверджаны загадам рэктара ВНУ і пачнуць дзейнічаць з 1 сакавіка.
Змены тлумачаць ростам тарыфнай стаўкі, змяненнем ўмоў аплаты працы прафесарска-выкладчыцкага складу і павелічэннем тарыфаў на камуналку. Папярэднія кошты былі вызначаны ў жніўні 2017-га.
Цяпер з'явіліся новыя кошты на навучанне на 1-3 курсах і 4-5 невыпускных курсах дзённага аддзялення, а таксама завочнага.
З 1 сакавіка, напрыклад, самы вялікі «тарыф» ў галоўным універсітэце краіны усталёўваецца для студэнтаў першых курсаў дзённага аддзялення на спецыяльнасцях «правазнаўства», «эканамічнае права» і «міжнароднае права» — па 3136 рублёў. Раней кошт складаў 2851 рубель.
Раней аб павышэнні кошту навучання з 1 сакавіка заявілі ў БДУІР.

ІП і адвакаты могуць паспець у апошні вагон

1 марта — крайні тэрмін выплаты страхавых унёскаў за 2017 год у фонд сацыяльнай абароны насельніцтва — нагадваюць індывідуальным прадпрымальнікам, натарыусам, адвакатам пра дэдлайн па выплаце страхавых узносаў за 2017 год.
Так, за мінулы год мінімальная сума страхавога ўнёску складае 1113 рублёў.
Пры нявыплаце ў тэрмін абавязковых страхавых унёскаў у бюджэт фонду налічваецца пеня. Індывідуальныя прадпрымальнікі, якія парушылі тэрміны выплаты абавязковых страхавых узносаў у бюджэт фонду, прыцягваюцца да адміністрацыйнай адказнасці, ім пагражае штраф у памеры 20% ад сумы абавязковых страхавых узносаў (1 113,00 × 20% = 222,60 руб.).

Падаражэюць мабільныя званкі

Сотавы аператар life :) анансаваў з 1 сакавіка змяненне кошту і ўмоў абслугоўвання некаторых тарыфаў і паслуг. Частка тарыфаў стане даражэйшай, непапулярныя прапановы зачыняцца, а іх абанентаў перавядуць на іншыя. Да прыкладу, павышаецца абаненцкая плата на некаторых тарыфных планах. Так, на тарыфе «Голас 1» штомесячны плацёж складзе 4,2 рублі (+ 7,6%), «Сям'я 2» — 26,5 рубля (6,4%), XL — 15 рублёў (+ 3,4% ). Аператар адзначае, што ў цэлым падвышэнне складзе каля 6%.
Аператар velcom анансаваў, што з 1 сакавіка зменяцца ўмовы і для фіксаванай сувязі: частка тарыфаў падаражэе, а некаторыя зачыняцца. Знікнуць некалькі дзесяткаў архіўных тарыфаў, напрыклад 4G, Wi-Fi + TV, Wi-Fi лайт, «Хатні» і іншыя. Іх абанентам прапануюць выбраць любы іншы актуальны тарыф. Тых, хто не пераключыцца сам, аператар аўтаматычна перавядзе на актуальны тарыф лінейкі «Хатні» або «Інтэрнэт 50».
Многія тарыфы фіксаванай сувязі з 1 сакавіка падаражэюць. Да прыкладу, для абанентаў тарыфу «Хатні Мінск» штомесячны плацёж складзе 21,5 рублі (8%), Wi-Fi — 28,9 рубля (+ 11,1%), «Лайт» — 18,9 рубля (+11 , 8%). Для некаторых прапаноў павялічыцца хуткасць доступу ў інтэрнэт.

Беларусы змогуць рабіць пакупкі ў Польшчы з абмежаваннямі

У Польшчы з 1 сакавіка ўступае ў сілу забарона на гандаль па нядзелях. Так, з 1 сакавіка гандлёвым цэнтрам і супермаркетам будзе дазволена працаваць толькі ў першую і апошнюю нядзелю месяца. Далей пачынаючы са  студзеня 2019 года гандаль будзе дазволены толькі ў апошнюю нядзелю месяца. На апошнім этапе ў 2020 годзе нядзельны гандаль павінен быць цалкам забаронены. У выглядзе выключэння крамам дазволяць працаваць чатыры нядзелі у год, а таксама перад Калядамі і Вялікаднем. Зараз гандлёвыя цэнтры і супермаркеты ў Польшчы застаюцца закрытымі толькі ў афіцыйныя святочныя дні.
Нагадаем, у 2017 годзе беларусы выдаткавалі ў польскіх крамах і на рынках 675 мільёнаў злотых, або 192,4 мільёны даляраў па курсе Нацбанка на 1 студзеня гэтага года. Для параўнання: ў 2016 годзе марнаванні склалі 170 мільёнаў даляраў, а ў 2015 годзе — 237,3 мільёны даляраў.

Паводле tut.by