Пяць гадоў з намі няма Ульяны Захаранка. Яна так і не дачакалася нават праўды пра забойства сына

Ульяна Рыгораўна памерла 14 траўня 2018 года на 95-м годзе жыцця. Ад першага дня знікнення Юрыя Захаранкі, 7 траўня 1999 года, яна штодня выходзіла на ганак і чакала яго. Але не дачакалася нават праўды пра яго забойства. Вечная памяць!

Былы міністр унутраных спраў Беларусі, адзін з лідараў апазіцыі Юры Захаранка быў скрадзены ў Мінску невядомымі 7 траўня 1999 года. Што далей стала з Юрыем Захаранкам, грамадскасці невядома.

У траўні 2016 года Ульяна Захаранка падала ў суд заяву аб прызнанні памерлым сына Юрыя Захаранкі, бо ён знік пры абставінах, якія даюць падставы меркаваць пра яго смерць.

Суд Кастрычніцкага раёна не стаў разглядаць па сутнасці заяву Ульяны Захаранкі аб прызнанні памерлым яе сына. Завёўшы грамадзянскую справу па заяве Ульяны Захаранкі, суддзя Вольга Біруля адразу ж далучыла яе да падобнай справы па заяве жонкі Юрыя Вольгі Захаранкі і спыніла вытворчасць да заканчэння расследавання па крымінальнай справе аб знікненні экс-міністра ўнутраных спраў. 

У Беларусі за час кіравання Аляксандра Лукашэнкі не раз знікалі вядомыя палітыкі і грамадскія дзеячы: 

• травень 1999 года — былы міністр унутраных спраў, генерал Юры Захаранка;
• верасень1999 года — віцэ-спікер Вярхоўнага Савета, экс-старшыня ЦВК Віктар Ганчар і бізнесовец Анатоль Красоўскі;
• ліпень 2000 году — тэлеапэратар Зміцер Завадскі.

Злачынствы дагэтуль не раскрытыя. Міжнародная супольнасць, праваабаронцы, апазіцыя сцвярджаюць, што ў краіне пад прыкрыццём уладаў дзейнічалі «эскадроны смерці».

Калега і сябар Змітра Завадскага Павал Шарамет правёў некалькі журналісцкіх расследаванняў пра знікненні ў Беларусі і зняў дакументальны цыкл «Дзікае паляванне».