Памежны пераход у Кузьніцы на мяжы з Беларуссю закрыюць на рамонт. Чакаюцца чэргі
Памежнікі папярэджваюць, што могуць паўстаць «часовыя цяжкасці ў перасячэнні дзяржаўнай мяжы», паведамляе «Свабода».
Памежны пункт Брузгі — Кузьніца, архіўнае фота «Свабоды»
Польскія памежнікі анансавалі маштабны рамонт на памежным пераходзе ў Кузьніцы, што на дарозе з Гродна на Беласток (з беларускага боку — Брузгі). Рамонт плануюць правесці ў два этапы:
1. Ад 22 ліпеня цягам двух месяцаў будзе закрыты выезд з Польшчы ў Беларусь.
2. Па заканчэнні гэтых работ (мяркуецца, у канцы верасня) яшчэ на два месяцы закрыюць адваротны кірунак, з Беларусі ў Польшчу.
Памежнікі папярэджваюць: «Могуць быць часовыя цяжкасці ў перасячэнні дзяржаўнай мяжы ўсімі відамі транспарту, што можа прывесці да павелічэння часу чакання праверкі на мяжы».
Звесткі пра чэргі на мяжы публікуюць у рэальным часе на сайце беларускага Памежнага камітэту.
Кузьніца — не адзіны памежны пераход між Беларуссю і Польшчай. Застаюцца працаваць пераходы Бераставіца – Баброўнікі (дарога на Беласток з Ваўкавыску і Слоніму), Пясчатка – Палоўцы (з Брэсту на Бельск-Падляскі), Дамачава – Славатычы (на поўдзень ад Брэсту), грузавы Казловічы – Кукурыкі (на поўнач ад Брэсту) і пасажырскі Брэст – Тарэспаль.