Памятаеце расійца, якога затрымалі за скокі праз Вечны агонь? Ён атрымаў рэальны тэрмін у калоніі

Вынесены прысуд расійцу, які папрасіў сябра зняць яго на фоне мемарыяла на плошчы Перамогі, у тым ліку — у скачку над Вечным агнём. Яго прызналі вінаватым у хуліганстве.

15 ліпеня суд Партызанскага раёна Мінска разгледзеў крымінальную справу ў дачыненні да расійца, якога абвінавацілі ў хуліганстве.

Згодна з матэрыяламі справы, 29 красавіка гэтага года, расіец «з нізінных памкненняў, якія выявіліся ў грубым парушэнні агульнапрынятых нормаў маралі і правілаў паводзін, не менш за два разы ўстаўшы на мармуровую пліту, усталяваную на рытуальнай пляцоўцы з Вечным агнём і абеліскам на плошчы Перамогі, два разы пераскочыў Вечны агонь, чым адкрыта і абразліва наздзекаваўся над звычаямі і традыцыямі грамадства».

«Абвінавачаны ў судовым пасяджэнні сваю віну прызнаў у поўным аб'ёме, у зробленым раскаяўся», — паведамляе прэс-служба суда.

Яго прызналі вінаватым у хуліганстве (ч. 1 арт. 339) КК Беларусі і прысудзілі да пазбаўлення волі на тэрмін 1 год і 1 месяц у папраўчай калоніі агульнага рэжыму.

Нагадаем, расіец часта бываў у Беларусі па працоўных пытаннях. Аднойчы яны з прыяцелем адправіліся паглядзець Мінск, і мужчына папрасіў сябра сфатаграфаваць яго на фоне мемарыяла на плошчы Перамогі, у тым ліку — у скачку над Вечным агнём. Мужчыны зрабілі здымкі і з'ехалі, аднак нехта з мінчан патэлефанаваў у міліцыю. У выніку расійца затрымалі ў ходзе наступнай камандзіроўкі.

Абвінавачаны — выпускнік ваеннай ВНУ, раней не судзімы, працуе мэнэджэрам у прыватнай расійскай кампаніі, на ўтрыманні мае дваіх малалетніх дзяцей.