Парламент лічыць, што моўнае пытанне ў заканадаўстве ўрэгулявана выдатна
Пастаянная камісія Палаты прадстаўнікоў па адукацыі, культуры і навуцы разгледзела заяву сходу Салігорскай арганізацыі Таварыства беларускай мовы аб неабходнасці надання беларускай мове не дэкларатыўнага, а сапраўднага дзяржаўнага статусу ды забеспячэння рэальнай роўнасці дзвюх дзяржаўных моваў ва ўсіх сферах жыцця.
Старшыня парламенцкай камісіі Аляксандр Сягоднік у сваім адказе салігорскім тэбээмаўцам ужо традыцыйна спаслаўся на афіцыйнае двухмоўе і права кожнага абіраць мову зносін. Па яго словах, дзеючае заканадаўства не абмяжоўвае права грамадзян карыстацца той або іншай дзяржаўнай мовай. Пытанні ж развіцця і ўжывання беларускай і рускай моваў, а таксама пытанні забеспячэння канстытуцыйных правоў грамадзян у моўнай сферы, на думку дэпутата, дадатковага ўрэгулявання на заканадаўчым узроўні не патрабуюць.
— Маючы зносіны з нашымі дзяржаўнымі органамі, заўсёды ўзгадваецца райкінкаўскае “да гузікаў прэтэнзіі ёсць?” У парламенце нам распавядаюць, што моўнае пытанне ў айчынным заканадаўстве выдатна ўрэгулявана. У профільных міністэрствах кажуць, што ўсё робіцца ў адпаведнасці з заканадаўствам, і ўвогуле з беларускай мовай у нас усё акей, — каментую рэакцыю ўладаў на свае звароты старшыня мясцовай суполкі ТБМ Уладзімір Масакоўскі. — Вось толькі беларускамоўныя садкі і школы ў гарадах адсутнічаюць. Тая ж тэндэнцыя і ў сферы адукацыі на вёсцы. Амаль паўсюль у грамадскім жыцці кіраўніцтвам выканкамаў, прадпрыемстваў, арганізацый і ўстаноў прынцыпы моўнай роўнасці не выконваюцца. На вуліцах беларускую мову ўжо амаль не чуваць.
Прадстаўнікі Салігорскай арганізацыі Таварыства беларускай мовы заклікаюць беларускамоўных грамадзян да актыўнага адстойвання сваіх правоў ды абяцаюць шэраг інавацыйных захадаў супраць моўнай дыскрымінацыі ўжо ў самай бліжэйшай будучыні.