Пасля скандалу з прастытуткамі міліцэйскага палкоўніка Дунаенку зрабілі педагогам

Месяц таму «Кі***партызаны» выклалі анімаваны фільм на аснове здабытых матэрыялаў праслухоўвання спецслужбамі камандзіра 6-й міліцэйскай брыгады 5525 палкоўніка Уладзіміра Дунаенкі. З запісаў вынікала, што ён мае праблемы з алкаголем і здраджвае жонцы і з калегай, і з прастытуткамі ў клубах. «Я хачу здохнуць!» — плакаўся Дунаенка каханцы пасля няўдалага паходу ў начны клуб. «НН» стала вядома, Дунаенку адправілі выкладчыкам факультэта ўнутраных войскаў Вайсковай акадэміі.

Развітанне з калектывам прайшло ўчора на базе 6-й асобнай спецыяльнай міліцэйскай брыгады ў Гомелі.

На месца Дунаенкі прызначылі падпалкоўніка Уладзіміра Голубева, а Дунаенка адпраўляецца ў сталіцу, у выкладчыкі на факультэт унутраных войскаў Вайсковай акадэміі.

Да прызначэння ў в/ч 5525 Дунаенка служыў ў 1-й міліцэйскай брыгадзе 5448 пад Мінскам. Менш за год таму яго адтуль перавялі ў Гомель пасля выпадку з'яўлення на рабочым месцы з фінгалам і іншымі слядамі перапою.

Да таго ж Віктару Жадобіну, сыну былога старшыні КДБ і міністра абароны, Юрыя Жадобіна, патрэбен быў кар'ерны рост — ён заняў месца камбрыга замест Дунаенкі ў 5448.

Што 5448, што 5525 — часці ўнутраных войскаў, байцы якіх бралі ўдзел у зверствах 2020-га.