Пятрухін малюе Брэсцкую крэпасць, Кабанаў трэніруецца з майстрам спорту па шахматах: «Я не здаюся»

Пытанне: як пачуваюцца ў няволі палітзняволеныя блогеры з Брэста? Адказ: не сумуюць.

У красавіку брэсцкія блогеры і актывісты Сяргей Пятрухін і Аляксандр Кабанаў былі асуджаныя на тры гады зняволення кожны. Што з імі цяпер і што яны пішуць з няволі?

Аляксандар Кабанаў — сябра Аб’яднанай грамадзянскай партыі, нагадвае «Свабода». Старшыня АГП Мікалай Казлоў паведаміў са спасылкай на сваякоў Аляксандра Кабанава, што той цяпер у вязніцы ў Магілёве.

«Называюць адрас калоніі № 15 у Магілёве, што ён цяпер там. Ці канчатковае гэта месца адбыцця пакарання, не ведаем. Раней былі звесткі пра яго, што вывозілі для нейкіх дзеянняў у Брэст, але вярнулі ў Магілёў. Пра апеляцыю невядома, але наш адвакат з ім у кантакце, калі будзе прызначана апеляцыя, праінфармуе», — расказаў Мікалай Казлоў.

Яму невядома, дзе цяпер сябар Кабанава — блогер Сяргей Пятрухін.

Пра ліставанне з Сяргеем Пятрухіным і Аляксандрам Кабанавым расказала жыхарка Брэста, якая прасіла не называць яе імя.

«Падабаецца, што яны не разгубіліся, захавалі сілу духа, у іх лістах шмат гумару і аптымізму. Яны нас заражаюць энергіяй, раяць, як далей змагацца супраць акумулятарнага заводу, мы да іх прыслухоўваемся», — кажа суразмоўца пра лісты Аляксандра Кабанава і Сяргея Пятрухіна.

«Ні на што не скардзяцца, прымаюць выпрабаванні мужна. Пра здароўе таксама пішуць, што нармальнае», — дадае жанчына. Паводле яе, у лістах Сяргея Пятрухіна шмат малюнкаў. Ёй асабліва запомніўся малюнак Брэсцкай крэпасці з сімвалічнымі словамі «Я не здаюся». «Гэта і пра яго вельмі трапна сказана», — заўважае жанчына.

Пра Аляксандра Кабанава актывістка згадала, што той сядзеў у камеры разам з майстрам спорту па шахматах, які даваў сукамерніку ўрокі майстэрства.

«У адным з лістоў Аляксандр напісаў, што не шкадуе, што гэтак з ім здарылася, лічыць, што ўся Беларусь праходзіць праз гістарычнае выпрабаванне. Запомніліся і гэткія яго словы з ліста: «У краіну ідуць перамены, і яны закрануць кожнага. Шкада, што гэтыя думаюць, нібыта гэтак застанецца назаўсёды. Не вучаць гісторыю — значыць, гісторыя навучыць іх. А мы дапаможам, усе хады запісаныя (смайлік)», — згадала суразмоўца ліст ад Аляксандра Кабанава.

Паводле жанчыны, апошні ліст ад Аляксандра Кабанава яна атрымала яшчэ ў сакавіку, а вось Сяргей Пятрухін апошні раз напісаў ёй у маі. Ліст быў адасланы з вязьніцы ў Магілёве. Жанчына мяркуе, што Сяргей Пятрухін яшчэ там і чакае апеляцыі на прысуд.

«Збольшага ўсё нармальна. Чакаем, пакуль камень пакоціцца. На зону збіраюся ў канцы чэрвеня. Апеляцыя яшчэ не прызначаная, мяркуючы па ўсім, будзе ў канцы ці сярэдзіне чэрвеня. Усім прывітанне. Хутка ўсё скончыцца. Гэта дакладна», — напісаў Сяргей Пятрухін у лісце ад 13 мая.

Па тры гады зняволеньня і па 750 рублёў грашовага спагнання Аляксандру Кабанаву і Сяргею Пятрухіну прысудзіла суддзя Кастрычніцкага раённага суду Магілёва Вольга Краўчанка. За пратэст блогераў выдалілі з судовай залы і нават пазбавілі права прамовіць апошняе слова.

Блогераў Кабанава і Пятрухіна асудзілі за арганізацыю беспарадкаў і знявагу прадстаўнікоў улады. Віны яны не прызналі. Беларускія праваабаронцы прызналі Аляксандра Кабанава і Сяргея Пятрухіна палітвязнямі.