Пракуратура патрабуе перагледзець справы за «пікет у лесе»

13-га студзеня ў Шпілёўскім лесе пад Віцебскам міліцыя затрымала шасцярых жынчын, якія выйшлі займацца скандынаўскай хадой.

«Майстар-клас» паказвала Таццяна Севярынец, і на ўсіх затрыманых ў аддзеле міліцыі Першамайскага раёну склалі пратаколы за несанкцыянаванае пікетаванне. 19-га і 20-га студзеня пяцярых жанчын судзілі. У судах Кастрычніцкага раёну (суддзя Уладзімір Царыкаў) і Першамайскага раёну (суддзя Вераніка Барысава) адміністрацыйныя справы скасавалі праз адсутнасць доказаў правапарушэння.
Аднак у гарадской пракуратуры вырашылі, што гэтыя рашэнні трэба адмяніць – прынамсі, датычна двух чалавек, распавяла Таццяна Севярынец:

– Патэлефанавалі з Першамайскага суду: «Таццяна Яўгенаўна, ці маглі б вы пад’ехаць, пазнаёміцца – прыйшло прадпісанне пракурора справу перагледзець, вашу і Алены Касновай». Кажу, добра, у панядзелак зранку я прыйду, зірну, сфатаграфую, што там такое. Пытаюся: «А як прозвішча таго клапатлівага пракурора?». Сказалі, Дубаў.
Пакуль няма звестак, ці прыйшло падобнае спавяшчэнне пракуратуры ў суд Кастрычніцкага раёну, дзе судзілі яшчэ трох удзельніц так званага «пікета ў лесе» – Людмілу Камінскую, Людмілу Валадкевіч і Раісу Кухто. Суду над Тамарай Ільіной дагэтуль не было: 66-гадовая пенсіянерка трапіла ў кардыялагічны шпіталь пасля таго, як жанчын, палова з якіх ужо сталага веку, амаль 8 гадзін трымалі ў міліцыі без ежы і магчымасці прыняць лекі.

racyja.com