У Беларусі створаць рэестр арганізатараў культурна-забаўляльных мерапрыемстваў

Арганізатары, не ўключаны ў яго, не могуць праводзіць культурна-забаўляльныя мерапрыемствы.

Рэестр арганізатараў культурна-забаўляльных мерапрыемстваў фарміруюць у Беларусі. Гэта прадугледжана пастановай Савета Міністраў ад 22 чэрвеня 2022 года нумар 401, паведамляе БЕЛТА са спасылкай на Нацыянальны прававы інтэрнэт-партал.

Рэестр дасць магчымасць упарадкаваць работу па арганізацыі і правядзенні такіх мерапрыемстваў, улік і сістэматызацыю звестак аб арганізатарах. Ён будзе базай даных краіны.

У рэестры будуць размешчаны звесткі аб арганізатарах з ліку ІП, юрыдычных асоб (акрамя дзяржорганаў, дзяржарганізацый і арганізацый, у статутных фондах якіх 50 працэнтаў і больш акцый (долей) знаходзіцца ва ўласнасці Беларусі або яе адміністрацыйна-тэрытарыяльных адзінак), а таксама замежных або міжнародных арганізацый, у тым ліку якія не з’яўляюцца юрыдычнымі асобамі.

Інфармацыя ў рэестры павінна быць поўнай і дакладнай, адкрытай і даступнай для ўсіх. Фарміраваць і весці яго будзе Міністэрства культуры або ўпаўнаважаная ім юрыдычная асоба.

Для ўключэння ў рэестр арганізатару трэба накіраваць заяву ў ведамства і шэраг дакументаў. Дакументы разгледзіць рэспубліканская экспертная камісія пры Мінкультуры. Яна ўлічыць мастацкі ўзровень культурна-забаўляльных мерапрыемстваў, праведзеных арганізатарам. Таксама камісія зверне асаблівую ўвагу на наяўнасць фактаў адмены мерапрыемстваў без уважлівых прычын, іх правядзення з парушэннем патрабаванняў Кодэкса аб культуры, іншых актаў заканадаўства, парушэння тэрмінаў выплаты грашовай кампенсацыі кошту ўваходнага білета, яго нявыплаты або выплаты ў няпоўным памеры.

Арганізатары, якія падлягаюць уключэнню ў рэестр, але не ўключаны ў яго, не могуць праводзіць культурна-забаўляльныя мерапрыемствы.

Гэта норма не датычыцца мерапрыемстваў, пасведчанне на права арганізацыі і правядзення якіх на тэрыторыі Беларусі выдадзена да 1 жніўня 2022 года.

Асноўныя палажэнні пастановы ўступаюць у сілу пасля яе афіцыйнага апублікавання.

 Паводле budzma.org