У Бярозе звальняюць настаўніка, які ў 2020 годзе адмовіўся везці калег на праўладны мітынг в Мінск
У Бярозе звальняюць настаўніка, які адмовіўся весці групу калег у Мінск на праўладны мітынг 16 жніўня 2020 года.
Праваабаронцам стала вядома, што ў Бярозе не падаўжаюць кантракт настаўніку вышэйшай катэгорыі, навукоўцу, «выдатніку адукацыі», вялікаму аматару беларускай мовы і літаратуры, выкладчыку-метадысту, лектару курсаў перападрыхтоўкі і павышэння кваліфікацыі для настаўнікаў пры Брэсцкім дзяржаўным універсітэце імя А. Пушкіна Мікалаю Жуковічу. Ён з’яўляецца аўтарам школьных падручнікаў па беларускай літаратуры для пачатковых і сярэдніх класаў.
Мікалай Жуковіч 26 гадоў працаваў дырэктарам першай школы
горада Бярозы, выкладаў беларускую мову і літаратуру, займаўся навуковай
дзейнасцю, быў аўтарам метадычных дапаможнікаў для настаўнікаў, арганізоўваў
сустрэчы з культурнымі дзеячамі для сваіх вучняў.
Мясцовыя звязваюць скасаванне працоўных зносін з падзеямі жніўня 2020 года. Тады Мікалай Жуковіч адмовіўся ад ўдзелу ў фальсіфікацыі выбараў, а пасля і наогул адмовіўся весці групу настаўнікаў у Мінск на праўладны мітынг 16 жніўня 2020 года. Пасля гэтага ён пазбавіўся пасады дырэктара і заняў пасаду намесніка дырэктара. Паводле непацверджанай інфармацыі, аддзел адукацыі Бярозаўскага райвыканкама прыняў рашэнне не працягваць кантракт з дасведчаным настаўнікам.
На праўладны мітынг 16 жніўня 2020 года лукашэнкаўцы арганізавана звозілі бюджэтнікаў з усёй краіны. Улады імкнуліся зрабіць з яго антытэзу народным пратэстам і прадэманстраваць шырокую падтрымку дзеючага рэжыму. На тым мітынгу нават удзельнічаў Лукашэнка, але стварыць карцінку «ўсенароднай падтрымкі» не ўдалося. Як падлічылі потым незалежныя журналісты з дапамогай сервісу MapChecking, тая праўладная акцыя на плошчы Незалежнасці сабрала максімум 31 тысячу чалавек.
У той жа час у іншым месцы — каля стэлы на праспекце Пераможцаў — адбылася акцыя супраць Лукашэнкі. У ёй, нягледзячы на рызыкі затрыманні і рэпрэсій, сабралося, паводле розных ацэнак, ад 200 да 500 тысяч чалавек. І гэта дакладна быў самы шматлікі мітынгу у гісторыі незалежнай Беларусі. У той жа дзень пратэставалі і ў іншых гарадах, і там таксама на вуліцы выйшла рэкордная колькасць людзей.