У Печах зноў загінуў вайсковец

Мінабароны паведаміла, што ў Печах загінуў вайсковец — інструктар па ваджэнні.

Ілюстрацыйнае фота

Ілюстрацыйнае фота

Міністэрства абароны паведаміла пра гібель вайскоўца ў навучальным цэнтры ў Печах. Прычынай называюць парушэнне правілаў эксплуатацыі тэхнікі.

«Падчас правядзення планавых заняткаў у 72-м гвардзейскім аб'яднаным навучальным цэнтры падрыхтоўкі прапаршчыкаў і малодшых спецыялістаў у выніку парушэння правілаў эксплуатацыі тэхнікі вайсковец, інструктар па ваджэнні, атрымаў траўму, несумяшчальную з жыццём», — паведамляе прэс-служба Мінабароны.

Цяпер ведамства разам з прадстаўнікамі праваахоўных органаў праводзяць праверку, каб высветліць прычыны і акалічнасці здарэння.

Міністэрства абароны выказала спачуванні родным і блізкім загінулага.

У навучальным цэнтры ў Печах інцыдэнты з гібеллю салдат адбываюцца з зайздроснай рэгулярнасцю. Але адной з самых рэзанансных падзей стала смерць салдата Аляксандра Коржыча 3 кастрычніка 2017 года.