У Віцебску адключылі электратабло з раскладам гарадскога транспарту. Прычына — неаплата за электрычнасць

Электронныя табло з раскладам руху гарадскога транспарту ў Віцебску адключылі праз запазычанасць па аплаце электраэнергіі, іх павінны дэмантаваць, пішуць «Народныя навіны Віцебска».

Пару тыдняў таму журналісты заўважылі, што гэтыя электронныя табло перасталі працаваць і адлюстроўваць інфармацыю пра бліжэйшыя рэйсы грамадскага транспарту. Гараджане падалі заяўку аб гэтым недахопе на партал 115.бел.

З адказу аддзела ЖКГ Віцебскага гарвыканкама на гэтую заяўку стала вядома, што табло былі адключаныя з-за несвоечасовай аплаты электраэнергіі і назапашанай запазычанасці. Больш за тое, яны падлягаюць дэмантажу.

Нагадаем, што такія табло сталі з'яўляцца на прыпынках грамадскага транспарту ў абласным цэнтры ў 2019 годзе. На Прывакзальнай плошчы, напрыклад, табло ўсталявалі ў канцы лістапада таго года.

Электронны расклад транспарту на некаторых прыпынках Віцебска з'явіўся па ініцыятыве Віцебскага абласнога камунальнага транспартнага ўнітарнага прадпрыемства «Аператар перавозак», якое забяспечвае экспарт даных аб руху грамадскага транспарту. А вось вырабляць і эксплуатаваць табло павінна было нейкае ТАА «Час славы», зарэгістраванае ў Барысаве.

Павялічацца камуналка, падаткі, пенсійны ўзрост. Што зменіцца ў Беларусі з 1 студзеня?

Да 2020 года гэтае рэкламнае агенцтва паспела ўсталяваць больш за 30 экранаў па ўсёй Беларусі — 2/3 плошчы табло выкарыстоўвалася пад рэкламу, а на ніжняй траціны трансляваўся расклад.

Год таму, падобна, фірма стала адчуваць фінансавыя цяжкасці, з яе сталі спаганяць запазычанасці шляхам прымусовага выканання.