У Віцебску знялі з паказу спектакль, у якім распавядаецца пра барацьбу з тыраніяй

21 лістапада ў Віцебску адбылася прэм'ера пастаноўкі «Ціль» аб адважным і знаходлівым правадыру гёзаў, якія змагаліся супраць тыраніі, а сёння спектакль ужо здымаюць з афіш, пішуць «Народныя навіны Віцебска».

Гэтая пастаноўка мастацкага кіраўніка тэатра Міхаіла Краснабаева паводле п'есы Рыгора Горына, заснаванай на рамане Шарля дэ Костэра, рыхтавалася да 95-годдзя Нацыянальнага акадэмічнага драматычнага тэатра імя Якуба Коласа.

У аснове згаданага рамана ляжыць вядомы сярэднявечны эпас пра легендарнага Ціля Уленшпігеля, які ў ліку паўстанцаў змагаўся супраць іспанскай тыраніі. 

У нядзелю, 21 лістапада, адбылася ўрачыстая прэм'ера, на якую было запрошана кіраўніцтва горада і вобласці, а таксама прысутнічаў міністр культуры Беларусі.

Не зразумела, якую крамолу ўбачылі чыноўнікі ў спектаклі, але, паводле крыніц «ННВ», пастаноўку знялі з паказаў, а дырэктара тэатра выклікалі ў сталіцу.

Пацвярджэннем таго, што спектакль «Ціль» трапіў у няміласць, стала тое, што ён пачаў знікаць з афіш. На сайце kvitki.by прадаваліся квіткі на гэтую пастаноўку на 11 снежня, але цяпер паведамляецца пра адмену спектакля. У афішы самога тэатра на гэты дзень зараз ужо няма ніякіх спектакляў.