Ва ўсіх раёнах Віцебскай вобласці забаронена наведваць лясы
Нягледзячы на тое што мінулыя дажджы некалькі знізілі клас небяспекі, пагроза лясных пажараў застаецца.
Ва ўсіх раёнах Віцебскай вобласці з 18 чэрвеня ўведзена забарона на наведванне лясоў.
Па прагнозах сіноптыкаў, у бліжэйшыя выходныя на тэрыторыі рэгіёну ападкаў асабліва не чакаецца, і высокая пажарная небяспека (4-ы клас) захаваецца ў большасці раёнаў.
З пачаткам спякотнага перыяду дзяржаўная лясная ахова працуе ва ўзмоцненым рэжыме, арганізаваны дзяжурствы ў лясніцтвах, рэйдавыя мерапрыемствы ў лясным фондзе, у тым ліку ў асабліва небяспечных участках, зонах адпачынку.
Разводзіць вогнішчы ў лесе можна толькі ў спецыяльна адведзеных месцах. За парушэнне прадугледжана папярэджанне або штраф у памеры да 12 базавых велічынь (цяпер адна базавая велічыня роўная 180 тыс. рублёў). З'яжджаючы, старанна засыпце вогнішча зямлёй ці заліце вадой да поўнага спынення тлення. Не кідайце непатушаныя запалкі і недапалкі. Не пакідайце прасякнутыя бензінам або алеем анучы, пустыя слоікі і бутэлькі, разбітае шкло. Ня запраўляйце ў лесе машыну, калі працуе рухавік.
Знаходзіцца ў лясных масівах можна толькі ў тых месцах, дзе ёсць спецыяльна абсталяваныя месцы для адпачынку, стаянкі турыстаў. Забараняецца ўязджаць на ўсе лясныя дарогі (за выключэннем дарог агульнага прызначэння, якія праходзяць праз лясныя масівы) і самастойна адкрываць апушчаныя шлагбаўмы на ўездах у лес.