Валерый Карбалевіч пра новы заканапраект: Апанентам рэжыму забароняць любую дзейнасць, дна няма

Для чаго ўлады адраджаюць крымінальную адказнасць за дзейнасць незарэгістраваных арганізацый?

У Беларусі прапануецца ўвесці крымінальную адказнасць за ўдзел у ліквідаваных і незарэгістраваных арганізацыях — адпаведны законапраект ужо ўхваліла Палата прадстаўнікоў.

Якія арганізацыі раней за іншых рызыкуюць трапіць пад удар і ці будуць улады даводзіць да прысуду кожную справу або абмяжуюцца асобнымі паказальнымі карамі для застрашвання нелаяльных?

— Шчыра кажучы, у мяне няма адказу на пытанне, па кім першым прыйдзецца ўдар, — сказаў у экспрэс-каментары «Салідарнасці» палітолаг Валерый Карбалевіч.

Эксперт нагадаў, што падобнае заканадаўства ўжо існавала ў Беларусі раней. Адпаведны артыкул 193.1 з'явілася ў КК РБ напярэдадні прэзідэнцкіх выбараў 2006 года, па ім былі прыцягнуты да адказнасці больш за паўтара дзясятка чалавек, і ўлады неаднаразова аказвалі з яго дапамогай ціск на праваабаронцаў і грамадскіх актывістаў.

— Потым (у 2018 годзе) дзейнасць ад імя незарэгістраванай арганізацыі перавялі ў статус адміністрацыйных правапарушэнняў, — нагадвае Валерый Карбалевіч. — А цяпер зноў вяртаюць крымінальнае пакаранне.

Зразумела, што задача гэтай ініцыятывы прэвентыўная: запалохаць, не дапусціць дзейнасць ліквідаваных арганізацый, каб яна не аднавілася. Наколькі гэты артыкул будзе рэальна дзейнічаць, пакуль складана сказаць, роўна як і складана ідэнтыфікаваць, якім чынам ён парушаўся.

У Беларусі ж ёсць артыкулы, так скажам, «маўклівыя» — наколькі я ведаю, за дыскрэдытацыю Рэспублікі Беларусь і органаў улады нікога пакуль не судзілі, хоць такі артыкул ёсць і, у прынцыпе, любога журналіста можна па ім прыцягнуць.

У цэлым, адзначае палітолаг, дзеянні ўладаў з'яўляюцца лагічным працягам узмацнення жорсткасці «антырэвалюцыйнага» заканадаўства, якое адбываецца ў Беларусі ў апошні год.

— Адбываецца ліквідацыя любой легальнай дзейнасці для ўсіх апанентаў рэжыму, для ўсіх іншадумцаў. Дна няма, і я думаю, што па меры ўзмацнення жорсткасці рэжыму будзе больш жорсткім і заканадаўства, — рэзюмуе Валер Карбалевіч.