Палітзняволеным экс-кандыдату ў прэзідэнты Андрэю Саннікаву і лідару зарэгістраванага ў Чэхіі “Маладога фронта Змітру Дашкевічу пагражае смяротная небяспека. Не лепшая
сітуацыя і з палітвязнем Міколам Статкевічам. Пра гэта 28 верасня на прэс-канферэнцыі ў Мінску заявілі жонка Саннікава журналістка Ірына Халіп і праваабаронца Алена Танкачова.
“Я магу сказаць абсалютна дакладна, што жыццю майго мужа пагражае небяспека. Такая ж небяспека пагражае жыццю Змітра Дашкевіча. Адвакат Андрэя, якая наведала яго ў СІЗА горада Магілёва,
перадала яго пасланне: ратуйце Дашкевіча любымі шляхамі, хоць да напісання прашэння аб яго памілаванні ўсім беларускім народам! Інакш ён не выжыве, – паведаміла
Ірына.
Па словах жонкі Саннікава, яшчэ 20 верасня ніхто не ведаў пра перавод яе мужа ў іншае месца. Адміністрацыя Наваполацкай калоніі, дзе знаходзіўся Саннікаў, была скрайне здзіўлена, атрымаўшы нейкую
дэпешу, што яго трэба адпраўляць на этап. Папярэдне, адзначае журналістка, яе мужу паведамілі, што, магчыма, яго вязуць у Бабруйскую калонію.
“Мы з адвакатамі тэлефанавалі ў Бабруйск, і нам сказалі, што этап прыбудзе ў чацвер. У пятніцу, калі адвакаты ўжо збіраліся ехаць у Бабруйск, ім паведамілі, што этап быў, але Саннікава там
не было, ён прыбудзе ў суботу, – распавядае Ірына.
– У панядзелак высветлілася, што ў суботу ён таксама не прыбыў. Толькі пасля гэтага, у той жа панядзелак, я накіравалася ў Дэпартамент выканання пакаранняў МУС Беларусі, дзе мне сказалі, што
ён знаходзіцца ў Магілёўскім СІЗА. Са слоў Андрэя, 20 верасня этапам яго адвезлі ў Віцебскае СІЗА. Падчас вобшуку чалавеку, які займаўся асабістым даглядам Саннікава, некалькі разоў нехта тэлефанаваў
на мабільнік, і Андрэй выпадкова праз слухаўку некалькі разоў чуў сваё прозвішча. Затым яго завялі ў камеру, дзе ўжо знаходзіліся трое, адзін з іх быў Зміцер Дашкевіч, якога, як высветлілася,
прывезлі ў той жа дзень. Два іншых зняволеных – Сяргей Давыдовіч і Андрэй Грыгор’еў – паводзілі сябе вельмі дзіўна. Давыдовіч, у прыватнасці, некалькі разоў сыходзіў з
камеры, потым вяртаўся, чаго з “транзітнікамі не бывае ўвогуле. Ён казаў, што яму робяць планавыя ўколы, але гэта малаверагодна. Затым той жа самы Давыдовіч пачаў казаць Дашкевічу,
што недзе краем вуха чуў, што ў Дашкевіча будуць вялікія праблемы ў Глыбокім, куды яго пераводзяць, што, хутчэй за ўсё, яго заб’юць. Дашкевіч заявіў, што ўспрымае гэта як правакацыю, і
папрасіў перавесці яго ў іншую камеру… Па словах Саннікава, Дашкевіч знаходзіцца ў страшэнным стане, вельмі схуднелы, у яго не было ежы, бо ён быў пазбаўлены перадач і ўсяго іншага ў
Горацкай калоніі… Потым Саннікава пачалі рыхтаваць да этапу, разам з ім адправілі сукамерніка па Віцебскай турме Грыгор’ева. У Магілёўскім СІЗА Андрэя прывялі ў камеру, дзе былі
два зняволеных, што знаходзяцца на строгім рэжыме – Андрэй Барысаў і Руслан Гайс. Яны самі былі здзіўлены, што строгі рэжым перамешваецца з узмоцненым, на які быў асуджаны Саннікаў. Потым у
камеру завялі таго ж Грыгор’ева, які сказаў, што падчас этапу да яго падыходзілі двое ў цывільным і папярэджвалі, што варта быць вельмі асцярожным, знаходзячыся ў адным памяшканні з
Саннікавым, паколькі супраць Саннікава будуць сур’ёзныя правакацыі, і, хутчэй за ўсё, яго заб’юць альбо сур’ёзна скалечаць, і гэта адбудзецца альбо ў Магілёве, альбо на
этапе ў Бабруйск. Барысаў і Гайс успрынялі гэтыя словы як кіраванне да дзеяння і пачалі казаць: да, Андрэй Алегавіч, да Бабруйска вы не заедзеце, мы вас, канешне, забіваць не збіраемся, але
правакацыі могуць быць розныя… А яшчэ вас могуць пасадзіць у камеру з людзьмі з нізкім сацыяльным статусам, а гэта зусім ужо кепска. Андрэй двое сутак не спаў, бо апасаўся нападу падчас
сну. Ён запісаўся на прыём да адміністрацыі СІЗА Магілёва, але гэта не атрымала ніякага дзеяння. Яму адмовілі ў сустрэчы з адвакатам, у дапамозе з боку медыка. Толькі пасля майго наведвання
Дэпартамента выканання пакаранняў стала вядома, што Саннікаў знаходзіцца ў СІЗА Магілёва, да яго выехала адвакат, яна напісала заяву аб пагрозе яго жыццю і здароўю, і Андрэя тут жа перавялі ў іншую
камеру – у адзіночку. То бок, такім чынам і кіраўніцтва турмы, і ДВП пацвердзілі, што такая пагроза сапраўды існуе.
Як падкрэсліла Ірына Халіп, гледзячы па таму, што Дашкевіча і Саннікава роўна ў адзін дзень вырвалі з іх калоній, абодвух адправілі ў Віцебск, была выбудавана нейкая шматхадоўка. “Я не
выключаю, што якімсьці чынам у гэтай шматхадоўцы таксама ўдзельнічае і Мікалай Статкевіч, проста мы нічога пра яго не ведаем. Таму ўжо зараз трэба крычаць, – лічыць жонка Андрэя
Саннікава. Яна звярнулася да калег-журналістаў: “Я прашу вас, калегі, калі ёсць магчымасць, максімальна распаўсюджвайце гэтую інфармацыю, таму што галоснасць – гэта бяспека. Калі мы
ўсе разам пачнем распаўсюджваць гэтую інфармацыю, пачнем нешта рабіць, магчыма, яны ўсё ж пабаяцца забіваць палітвязняў.
Праваабаронца Алена Танкачова адзначыла, што ўжо два тыдні няма ніякіх звестак ад экс-кандыдата ў прэзідэнты Мікалая Статкевіча. “Мы разумеем, што нешта адбываецца ў дачыненні да гэтай групы
людзей. Але мы не разумеем, што. Нам хацелася б верыць, што гэта нейкая апошняя спроба зламаць іх псіхалагічна, магчыма, у тым ліку і праз фізічны ціск. Мы канстатуем, што ўвазрос ціск, які выклікае
нашу каласальную занепакоенасць, – заявіла Танкачова.
– Я звяртаюся да прадстаўнікоў дыпламатычных місій: мы чакаем ад вас дзеянняў, накіраваных на ўваход да Змітра Дашкевіча. Хаця б прадпрымайце дыпламатычныя захады і абвяшчайце пра гэта
грамадскасці.
