З Вольгі Маёравай знялі абвінавачанне ў тэрарызме

У лісце да сына палітзняволеная Вольга Маёрава паведаміла, што з яе знялі абвінавачанні па двух артыкулах.
Вольга Маёрава

Вольга Маёрава

«Вось толькі нядаўна адправіла табе ліст з нумарамі артыкулаў КК РБ, што мне ў выніку інкрымінуюць, і паведамленне пра новага бясплатнага адваката. [...] Так, адразу напішу, што арт. 16 (6) і 289 (2) з абвінавачання вынятыя, думаю, што хопіць і астатніх шасці, што засталіся», — піша палітзняволеная.

Нагадаем, у папярэднім лісце Вольга Маёрава паведамляла, што ёй пагражаюць 8 крымінальных артыкулаў. Цяпер з абвінавачання прыбралі артыкулы 16 (6) — саўдзел у злачынстве і 289 (2) — акт тэррарызму. Такім чынам, Вользе Маёравай інкрымінуюць наступныя артыкулы:

- частка 2 арт. 285 — Удзел у злачыннай арганізацыі ў любой іншай форме;

- частка 3 арт. 130 — Дзеянні па рэабілітацыі нацызму, учыненыя групай асоб, або якія пацягнулі па неасцярожнасці смерць чалавека або іншыя цяжкія наступствы;

- частка 4 арт. 295 — Незаконныя дзеянні ў адносінах да агнястрэльнай зброі, боепрыпасаў і выбуховых рэчываў, учыненыя арганізаванай групай;

- частка 3 арт. 361 — Заклікі да мер абмежавальнага характару (санкцый), іншых дзеянняў, накіраваных на нанясенне шкоды нацыянальнай бяспецы Рэспублікі Беларусь, учыненыя з выкарыстаннем сродкаў масавай інфармацыі або глабальнай камп'ютарнай сеткі Інтэрнэт;

- частка 2 арт. 257 — Падман спажыўцоў, учынены групай асоб па папярэдняй змове, або асобай, раней судзімай за падман спажыўцоў, або ў буйным памеры;

- частка 1 арт. 14 — Замах на злачынства.

«У самым разгары азнаямленне са справай. Адчуванні прадказальныя, але зразумела, што гэта нічога не зменіць у выніку», — зазначае палітзняволеная.

Вольга Маёрава дзякуе ўсім за падтрымку і перадачы, піша, што ёй усяго хапае, але заўсёды ёсць патрэба ў цвёрдым сыры і садавіне.

Вольгу Маёраву затрымалі 4 студзеня 2021 года ў яе доме ў вёсцы Нача Крупскага раёна па так званай «справе Мікалая Аўтуховіча». У доме быў праведзены ператрус, супрацоўнікі КДБ забралі з дома тэхніку.

Пішыце Вользе Маёравай на адрас: 230023, г. Гродна, вул. Кірава, 1, турма № 1.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: