Жанчына прыйшла ў міліцыю, каб заявіць аб крадзяжы, і апынулася ў ІЧУ за абразу Лукашэнкі

45-гадовая жыхарка вёскі Стракавічы Светлагорскага раёна падала ў міліцыю заяву аб крадзяжы грошай. Пасля выказванняў у РАУС супраць яе распачалі крымінальную справу аб абразе Лукашэнкі (артыкул 368 КК Беларусі), паведамляе адзін з праўладных каналаў.

Жыхарка Стракавічаў патэлефанавала ў міліцыю і заявіла, што яе знаёмая, з якой яны разам распівалі спіртное, скрала ў яе грошы. Жанчыну прывезлі ў РУУС.

«У аддзеле вяскоўка праявіла сябе ва ўсёй красе: палівала брудам супрацоўнікаў, патрабавала папаліць, брыдкасловіла і ў выніку ў прысутнасці супрацоўнікаў некалькі разоў абразіла прэзідэнта», — гаворыцца ў паведамленні канала.

У відэа з камер назірання ў РАУС жанчына кажа: «Давайце, напішыце пратакол, што я на Лукашэнку сказала», — пасля гэтага на частцы яе слоў знікае гук. У роліку жыхарка Страковічаў прамаўляе прозвішча Лукашэнкі некалькі разоў. Зараз жанчына знаходзіцца ў ІЧУ.