Зянон Пазняк пра мэтазгоднасць Астравецкай АЭС

Астравецкая атамная станцыя будуецца на расейскі крэдыт. Гэтае будаўніцтва беларусы аплочваюць з уласнай кішэні, аднак 50% электраэнергіі, якую гэтая станцыя будзе вырабляць, трэба будзе аддаваць Расеі, — адзначыў у час выступу ў Нью-Ёрку лідар Кансерватыўна-хрысціянскай Партыі БНФ Зянон Пазняк.



Палітык таксама прыгадвае, што станцыя будуецца на геалагічным разломе: 

— У Беларусі, якая не ёсць сейсмічнай зонай, пэўныя зоны ёсць, дзе землятрусы перыядычна здараюцца. Самая вялікая сейсмічная зона знаходзіцца менавіта тут, пад Астраўцом, у гэтым разломе. У 1908 годзе тут быў землятрус сілай да 7 балаў. Такія землятрусы маюць перыядычнасць у 150 гадоў. Бліжэйшым часам такі землятрус можа адбыцца. Тым не менш, станцыя будуецца менавіта тут. 

На думку Зянона Пазняка, гэтых фактаў дастаткова, каб сумнявацца ў эканамічнай мэтазгоднасці Астравецкай атамнай электрастанцыі. Тым больш, заўважае палітык, энергію плануецца прадаваць, аднак невядома, каму гэтая энергія будзе патрэбная.

Яна Запольская, Беларускае Радыё Рацыя