Журналістку АНТ аштрафавалі за язду непрышпіленай у тэлеэфіры
Падчас здымак старшыня Капыльскага райвыканкама і карэспандэнтка АНТ некалькі разоў сядаюць у аўтамабіль, але не прышпільваюцца рамянямі бяспекі.
Сюжэт на тэлеканале АНТ стаў нагодай для разбіральніцтва ў ДАІ, піша abw.by.
Сюжэт выйшаў у эфір 31 сакавіка (у запісе ён пачынаецца з 23-й хвіліны). Ён прысвечаны Капыльшчыне і Году малой радзімы. Падчас здымак старшыня Капыльскага райвыканкама Анатоль Ліневіч і карэспандэнтка АНТ Вольга Сулімава некалькі разоў сядаюць у аўтамабіль, але не прышпільваюцца рамянямі бяспекі. На заднім сядзенні можна заўважыць яшчэ і тэлеаператара, які таксама едзе непрышпіленым.
Тэлеглядач Аляксандр Максіменя накіраваў у ДАІ заяву, дзе выклаў сутнасць парушэнні.
З ДАІ УУС Мінгарвыканкаму яму адказалі, што "па выніках праведзенай праверкі кіроўца і пасажыр аўтамабіля Hyundai прыцягнуты да адміністрацыйнай адказнасці".
Фота: abw.by