Адам Мальдзіс: Ці казаў бы «польскі нацыяналіст» Каліноўскі: «Люблю Беларусь»? (відэа)

Памылковымі называе вядомы даследчык, прафесар Адам Мальдзіс выказванні асобных гісторыкаў, якія называюць паўстанне 1863 года польскім паўстаннем, а Кастуся Каліноўскага польскім нацыяналістам. Пра гэта Адам Мальдзіс заявіў у каментарыі Еўрарадыё.

Адам Мальдзіс, фота ЕўрарадыёАдам Мальдзіс: «А “Мужыцкую праўду” ён выдаваў на якой мове? Чаму ж ён не выдаваў яе на польскай мове ў такім разе? Гэта я хачу ў спытацца ў тых, хто называе Каліноўскага польскім нацыяналістам. Ён быў беларусам і паўсюдна падкрэсліваў сваю беларускасць. Але паколькі паўстанне пачалося адначасова і на тэрыторыі этнічна польскай, і на тэрыторыях этнічна літоўскай ды беларускай, і крыху на тэрыторыі ўкраінскай, то паўстанне тое было не польскім, а ўсеагульным. А сам Каліноўскі быў не польскім нацыяналістам, а беларускім! І на пытанне “Каго любіш?” адказваў “Люблю Беларусь”».

Нагадаем, у абноўленых падручніках па рускай літаратуры для 8-га класа паўстанне 1863-га года названае «Польскім паўстаннем пад кіраўніцтвам К. Каліноўскага». Пра тое, гэтае паўстанне было польскім, піша ў «Настаўніцкай газеце» і дэпутат Палаты прадстаўнікоў, член-карэспандэнт Акадэміі навук Ігар Марзалюк:
«Студзеньскае паўстанне 1863 года, дарэчы, ніхто з сучаснікаў нацыянальна-вызваленчым паўстаннем беларускага народа не называў. Як ніхто не называў Вікенція Канстанціна Каліноўскага беларускім нацыянальным героем. Усе сучаснікі выкарыстоўвалі зусім іншае азначэнне — польскае паўстанне на Літве і Беларусі. “Беларусізацыя” В.К. Каліноўскага пачалася толькі ў пачатку XX стагоддзя», — піша Ігар Марзалюк у сваім артыкуле.
Зміцер Лукашук, Еўрарадыё