Беларускі ПЭН працягне працу ў замежжы

Адбыўся ўстаноўчы сход для стварэння Беларускага ПЭНа ў замежжы: «У час крызісу і няпэўнасці Беларускі ПЭН лічыць асноўным крытэрам прыналежнасці да беларускай культурнай супольнасці не тэрытарыяльны, а каштоўнасны».

Асноўныя каштоўнасныя пазіцыі арганізацыі выкладзеныя ў Маніфесце няпэўнага часу, падрыхтаваным ініцыятыўнай групай.

«У час крызісу і няпэўнасці Беларускі ПЭН, адказваючы на спробы рэжыму раз’яднаць грамадства, заклікае Людзей Слова да адзінства і дыялогу... Беларускі ПЭН ацэньвае існы стан рэчаў у Беларусі як сітуацыю тэрору і заклікае рэжым неадкладна спыніць яго... Беларускі ПЭН лічыць найважнейшым прынцыпам сваёй дзейнасці беларусацэнтрычнасць. Усё, што мы робім, мы робім з думкамі пра Беларусь і для Беларусі», — гаворыцца ў Маніфесце.

Старшынёй Беларускага ПЭНа была абраная Таццяна Нядбай.

У Раду ўвайшлі: Святлана Алексіевіч, Вольга Шпарага, Юля Цімафеева, Андрэй Хадановіч і іншыя.

Сходам таксама зацверджаная назва для арганізацыі: Беларускі ПЭН – на беларускай мове, PEN Belarus – на англійскай.

Беларускі ПЭН з’яўляецца паўнапраўным чальцом Міжнароднага ПЭНа.