Дамалюй працяг: выйшла другая частка дзіцячага комікса «Не для чужых вачэй»
Выйшаў працяг прыгодніцкага комікса, выпушчанага ў падтрымку дабрачыннага праекта Беларускага дзіцячага фонду і кампаніі А1 «Я бачу!». З 4 снежня другую частку гісторыі пра школьнікаў, іншапланецян і незвычайныя акуляры можна атрымаць у падарунак у кнігарнях Мінска і Віцебска.
Штогод праект «Я бачу!», асноўным складнікам якога з’яўляюцца афтальмалагічныя агляды школьнікаў у сельскай мясцовасці, суправаджаецца разнастайнымі інфармацыйнымі кампаніямі.
«Сёлета брыгады ўрачоў-афтальмолагаў прыехалі ў кожную сельскую школу Віцебскай вобласці. Яны праверылі зрок у школьнікаў і далі ім неабходныя заключэнні, рэкамендацыі, рэцэпты. Але не менш важным складнікам праекта з’яўляецца прафілактыка парушэнняў зроку ў дзяцей, якой мусяць займацца ўрачы, педагогі, бацькі. Не павінны заставацца ў баку ад клопату аб сваім здароўі і самі школьнікі, таму кожны з іх атрымлівае памятку з карыснымі парадамі па захаванні зроку. А зараз нам дапамогуць коміксы, у якіх гэта важная інфармацыя сабрана ў незвычайнай і запамінальнай форме», – падкрэсліў дырэктар Беларускага дзіцячага фонду Аляксандр Трухан.
Сёлета пра тое, як важна зберагчы зрок, распавядаюць не толькі афтальмолагі, а яшчэ і персанажы комікса – Алеся, Ілья і Багдан. Прыгоды сяброў пачынаюцца з таго, што да іх у рукі трапляюць незвычайныя акуляры і стары дзённік з загадкавымі сімваламі, якія прыводзяць герояў да касмічнага карабля.
«Задача праекта заключаецца не толькі ў тым, каб прадаставіць афтальмалагічную дапамогу, але і каб зрабіць усё магчымае для таго, каб яна спатрэбілася як мага пазней – то бок даць дзецям і дарослым патрэбную інфармацыю. Сёлета для такога дыялогу мы выбралі форму комікса, і гэта спрацавала. Прыгодніцкая гісторыя захапіла школьнікаў, іх бацькоў, настаўнікаў, а значыць – мы на правільным шляху», – адзначылі ў кампаніі А1.
Фінальны выпуск комікса выйдзе на пачатку 2020 года, але ужо зараз аўтары прапануюць прыдумаць яго сюжэт самастойна: скарыстацца адмысловым сцікерпакам «Я бачу!» для Viber и Telegram, а таксама намаляваць свой комікс з тымі ж персанажамі і па матывах дзвюх папярэдніх частак, адправіць яго аўтарам – і, магчыма, менавіта гэты варянт працягу гісторыі будзе ўключаны ў апошні выпуск. Свае работы можна даслаць да 18 снежня ўключна. Адрас электроннай пошты для фан-арт работ: moderncomicsby@gmail.com.
Комікс арыентаваны на дзяцей ад дзесяці гадоў. Яго першая серыя пад назвай «Погляд у мінулае» выйшла ў лістападзе. Другая частка пад назвай «Не для чужых вачэй» – яе працяг. Кожная з іх змяшчае спецыяльныя практыкаванні для вачэй – гэтым разам, напрыклад, у выглядзе правілаў паводзін пры сустрэчы з НЛА.
Над гісторыяй працавалі Вольга Алданава (сюжэт, ілюстрацыі) і Мікіта Сеннікаў (сюжэт) – прадстаўнікі творчай суполкі «Сучасны комікс», створанай некалькі гадоў таму для аб’яднання ўсіх аўтараў нашай краіны, якія развіваюць гэты жанр.
«Комікс – гэта не проста гісторыя ў малюнках, а асаблівая мова, што дапамагае выказаць свае думкі. Шматлікія мастакі Marvel, DC, Image і іншых знакамітых студый пачыналі з таго, што перараблялі па-свойму чыіхсьці персанажаў. Мы прапанавалі дзецям уявіць сябе прафесійнымі аўтарамі і пафантазіраваць, чым скончыцца наша гісторыя», – патлумачыў Мікіта Сеннікаў.
Друкаваную версію і першай, і другой частак
комікса можна атрымаць у падарунак у кнігарнях кампаніі OZ: у Мінску на
праспекце Пераможцаў, 3 і ў Віцебску на вуліцы Леніна, 65.
Паводле прэс-рэліза