Калі ў Брэсце з’явіцца помнік беларускаму дзеячу?

«Помнік якому беларускаму дзеячу, на ваш погляд, варта было б усталяваць у Брэсце?» — з такім пытаннем кіраўнік Агенцтва рэгіянальнага развіцця «Дзедзіч» Дзмітрый Шыманскі звярнуўся да карыстальнікаў Фэйсбуку і УКантакце. Аапытанка сабрала больш за 150 каментароў з прапановамі аб усталяванні помніка навукоўцам, пісьменнікам, паэтам, дзяржаўным і рэлігійным дзеячам.

У топ-10 дзеячоў, якіх узгадвалі найчасцей, трапілі К. Каліноўскі, Т. Касцюшка, М. Радзівіл Чорны, А. Цвікевіч, У. Ігнатоўскі, У. Калеснік, Р. Траўгут, Я. Купала, Ю. Нямцэвіч, Р. Шырма.
Актывісты АРР «Дзедзіч» плануюць арганізаваць шырокую грамадскую дыскусію адносна разнастайных варыянтаў напаўнення гарадскога культурнага ландшафту нацыянальным зместам. Плануецца круглы стол з удзелам урбаністаў, краязнаўцаў і мастакоў. Досведам правядзення грамадскіх кампаній па ўсталяванні помнікаў беларускім дзеячам прыедуць падзяліцца актывісты з розных гарадоў Беларусі. Таксама будзе наладжаны збор прапаноў берасцейцаў па асобах, вартых ушанавання на вуліцах горада.
Адкрыты папярэдні запіс на ўдзел у круглым стале па абмеркаванні персаналій, вартых ушанавання на вуліцах Брэста. Да ўдзелу запрашаюцца урбаністы, краязнаўцы, дзеячы культуры і мастацтва, журналісты і грамадскія дзеячы. Калі ў вас ёсць канструктыўныя прапановы па канкрэтных асобах або іншыя ідэі па насычэнні гарадской прасторы нацыянальным кантэкстам, калі ласка, запаўняйце заяўку.
АРР «Дзедзіч» звяртаецца да НДА Беларусі і грамадскіх актывістаў з заклікам аказаць кансультатыўную і экспертную падтрымку ў арганізацыі грамадскай дыскусіі. Арганізатары будуць удзячныя за любыя парады і каментары, не адмовяцца ад рэкамендацый па экспертах, чыё меркаванне варта пачуць берасцейцам. Звяртацца можна на пошту dzedzich@gmail.com.
Паводле budzma.by