Кінафестываль “Cinema Perpetuum Mobile” у Гродне пачнецца з прагляду для моладзі

Другі штогадовы міжнародны фестываль пройдзе ў Гродне з 13 па 19 студзеня, адначасова з Мінскам, Брэстам, Віцебскам, Гомелем, Лідай, Мазыром, Наваполацкам і Салігорскам. .



get_img21.jpg

Адкрыецца фестываль у Гродне 13 студзеня паказам у Кальяннай №4 (вул.Карла Маркса) моладзевай праграмы.

Арганізатары падрыхтавалі карціны спецыяльна для тых, хто пакуль малады і энергічны.

Пачатак у 13 гадзін.

У 17 гадзін у памяшканні грамадскага аб’яднання «Цэнтр «Трэці сектар» (вул.Будзёнага 48а, 63) адбудзецца пазаконкурсны паказ гендэрнага кіно.

Гэта будуць рэжысёрскія гісторыі пра тое, як жанчыны застаюцца жанчынамі ў розных складаных, камічных і трагічных сітуацыях.

Арганізатары назвалі гэтую секцыю «Жаночая роля».

14 студзеня пазаконкурсная праграма дакументальных фільмаў пройдзе зноў у Кальяннай №4 у 19 гадзін.

Дакументальная праграма «Cinema Perpetuum Mobile» дапаможа стаць бліжэй да беларускай, украінскай, польскай і інтэрнацыянальнай рэчаіснасці.

15 студзеня будзе прысвечана пазаконкурснай анімацыйнай праграме.

Кароткаметражныя фільмы пра зомбі, Франкенштэйна, чарапах, вавёрку і васьмінога, праблемы экалогіі і сэнс жыцця. Палова з іх увайшла і ў конкурсную праграму, а значыць ужо атрымала высокую адзнаку гледачоў.

Паказ у Кальяннай №4 пачнецца ў 18 гадзін.

16 студзеня пройдзе пад знакам экалагічнага кіно.

На біяфаку ГрДУ імя Янкі Купалы (вул.Даватара, 3/1, ауд.114) паказ пазаконкурснай праграмы пачнецца ў 11.30.

У гэты ж дзень у кінатэатры «Чырвоная Зорка» пачнецца конкурсная праграма «Cinema Perpetuum Mobile».

Госць вечара — рэжысёр Арцём Лобач. Пачатак прагляду — 19.00.

Адбор фільмаў для конкурснай праграмы рабілі кінаманы, якія наведвалі перадпрагляды, што па выходных ладзіліся цягам месяца. Перадпрагляды (па 10 гадзін у дзень) наведалі 83 гледача, якія з 328 заяўленых адабралі 25. Іх вы і ўбачыце падчас конкурсных паказаў, да таго ж , большасць іх увайшла ў пазаконкурсныя тэматычныя праграмы.

У часе прагляду кожны з гледачоў атрымае магчымасць прагаласаваць за адзін фільм. Фільм-пераможца атрымае дыплом і сімвалічны прыз з Гродна.

17 студзеня пазаконкурсная праграма кінафестывалю ў Гродне будзе прысвечаная беларускім фільмам.

Ад удзельнікаў з Беларусі на «Cinema Perpetuum Mobile» было пададзена 75 заявак. У пазаконкурснай праграме можна будзе ўбачыць і анімацыю, і дакументальныя, і мастацкія фільмы, паўнаметражную драму і містыку са спецэфектамі.

Прагляд адбудзецца ў Кальяннай  №4 у 18 гадзін.

Гендэрная пазаконкурсная праграма «Залаты век, 55+» запрашае на прагляд у апошні дзень фестывалю, 19 студзеня, у памяшканні ГА «Цэнтр «Трэці сектар» у 14 гадзін.

Завершыцца фестываль «Cinema Perpetuum Mobile» паказам другой часткі моладзевай праграмы ў Кальяннай №4 у 13 гадзін.

Юлія Каляда, гарадзенскі каардынатар «Cinema Perpetuum Mobile»:

«Да ўдзелу ў конкурсе трапілі лепшыя 25 фільмаў, якія былі абраны "глядацкім жюры" на перадпраглядах у Мінску, гэта каля 5 гадзін. У Мінску іх пакажуць усе, у Гродне — лепшыя 14 (2 гадзіны), па меркаванні арганізатараў.

Справа ў тым, што фестываль некамерцыйны, і мы не маем магчымасці плаціць за арэнду кінатэатрам. А вялікія бясплатныя залі ў Гродне знайсці складана. Таму вельмі ўдзячныя «Чырвонай Зорцы», што яны далі нам магчымасць зрабіць паказ фільмаў у рамках кінаклуба "Ракурс".

Пазаконкурсная праграма, якая прапануецца гарадзенцам, была таксама абрана і прапанавана нам арганізатарамі з Мінску. Яна складаецца з фільмаў, якія аўтары заявілі на фестываль, але яны не прайшлі ў асноўную конкурсную праграму.

Выключна для Гродна робіцца паказ экалагічных фільмаў і фільмаў, цікавых для сталых людзей.

Усе прагляды ў межах «Cinema Perpetuum Mobile» у Гродне бясплатныя і адкрытыя для ўсіх. У праграме магчымыя змены, пра якія мы пастараемся па-магчымасці паведаміць».

t-styl.info