Космас наш! У Мінску стартаваў «Восеньскі салон з Белгазпрамбанкам»
У чацвёрты раз у мінскім Палацы мастацтва распачаўся «Восеньскі салон». Сёлета найбуйнейшы арт-праект сталіцы разам з індывідуальнымі работамі мастакоў прапануе на выставе-продажу творы мастацтва з галерэй і прыватных калекцый.
На працягу месяца наведвальнікаў выставы таксама чакаюць майстар-класы, экскурсіі, тэатральныя пастаноўкі і лекцыі айчынных ды замежных экспертаў.
Жывапіс, графіка, скульптура, арт-аб’екты, фота… У гэтым годзе на ўдзел у «Восеньскім салоне» падалі рэкордную колькасць заявак за ўвесь час існавання праекту — 456. Але ўдзельнічаюць у ім толькі 124 аўтары, сярод якіх большасць — жанчыны.
Эка-арт праект “Sustainable Development Goals” арт-групы “12”.
Максім Каробкін “Гісторыі Івянца прысвячаецца”
Кацярына Янкоўская “Інфармацыйны пояс”.
Вольга Бычко “Райскі сад”.
Сафія Піскун “Час збіраць камяні”.
Уладзімір Царыковіч “Амаж гарбузам”.
Дар’я Бунеева “Местачковы матыў. Паставы”.
Станіслаў Гурскі “Міф”.
Вікторыя Савінкова “Карункі”.
Надзея Леановіч. “Мінск. Другая кальцавая”.
Усевалад Швайба “Armaturamater”, тры часткі.
Касманаўты Канстанціна Ладошкіна.
Алена Катоўская “Камсамольскае возера”.
Ілья Гічан “Свята восені”.
Прыцягваюць увагу работы, прысвечаныя космасу. Беларускі збор дэвіянтнага мастацтва «Космас наш» прадстаўлены Канстанцінам Ладошкіным. Мастак паказвае першых сабак, якія паляцелі ў Космас, і саміх касманаўтаў савецкай эпохі.
Працягвае скараць гледачоў сваімі працамі Аляксандр Бельскі. Сёлета мастак прапануе падзівіцца на «Сустрэчу на высокім узроўні» з галоўным персанажам карціны Дартам Вейдэрам.
Эка-арт праект «Sustainable Development Goals» прадставіла Арт-група «12». Яго стваральнікі звяртаюць увагу на сучасныя экалагічныя праблемы праз скульптуру і відэа-арт. Інсталяцыя з палусферамі з ядрамі Зямлі адпавядае 17 мэтам устойлівага развіцця. Сярод глабальных праблемаў, якія неабходна вырашыць да 2030 года — ліквідацыя беднасці і голада, захаванне марскіх экасістэм, барацьба з змяненнем клімата. Калі сумясціць усе 17 частак інсталяцыі, атрымаецца непадзельны арганізм, адзіны на ўсіх людзей свет, дзе кожны чуе і разумее адзін аднаго, пакідаючы ўласны след у гісторыі планеты.
«Восеньскі салон з Белгазпрамбанкам» працягнецца да 4 лістапада. Завітвайце ў Палац мастацтва з 11 да 20 гадзін, ён працуе штодня. Праграма мерапрыемстваў тут.
Фота і відэа аўтаркі